काठमाडौं । राजनीतिमा को कतिबेला शत्रु बन्छ को मित्र भन्ने नै हुँदैन ।
१० वर्षे सशस्त्र संघर्ष गर्दा माओवादीका अध्यक्ष पुष्पकमल दाहाल र नेता बाबुराम भट्टराईको सम्बन्ध कस्तो थियो भनेर भनि राख्नै पर्दैन । त्यति मात्र हो र गत निर्वाचनमा आफ्नै निर्वाचित क्षेत्र छाडेर भट्टराईले गोर्खाबाट दाहाललाई चुनाव जिताए ।
तर अहिले सम्बन्ध यस्तो भएको छ कि दुई नेताबीच पानी बाराबार छ । दाहालले भट्टराईको दल नेपाल समाजवादी पार्टी विभाजित गराएर एउटा समूह माओवादीमा मिलाएका थिए । सम्बन्ध यस्तोसम्म पुगेको छ कि अब दाहाल र भट्टराईबीच एक अर्काका विगतका कमजोरीसमेत छताछुल्ल बनाउने अभियानमा लागेका छन् ।
केहि दिनअघि गण्डकी प्रदेशसभाका सदस्य फणिन्द्र देवकोटाको प्रदेशसभा सदस्यता खारेज गरिदिने नेकपा माओवादी केन्द्रको निर्णयपछि त भट्टराई झनै आक्रोसित भएका छन् । पछि सर्वोच्च अदालतले देवकोटाको सदस्यता माओवादी केन्द्रले खारेज गर्न नसक्ने ठहर गरेको थियो ।
राजनीतिक रुपमा कुरा नमिलेपछि दाहालले गरेका अनियमिता र भ्रष्टाचारका कुरा भट्टराईले लगातार उठाउँदै आएका छन् । आज त झन् सामाजिक सञ्जालमा निकै पुरानो फोटो राखेर त्यसमा टिप्पणी खोजेका छन् । उनले दाहाल भ्रष्टाचार गरेर मोटाएको संकेत गर्दै भनेका छन् – गत ३० वर्ष (सन् १९४–२०२४)मा को कति मोटायो आफैं मूल्यांकन गरौं ।
