एजेन्सी । आईसीसी टी–२० विश्वकप क्रिकेटको दोस्रो चरणको खेलमा इङ्गल्यान्डले वेस्ट इन्डिज हराएको छ । बिहिबार बिहान भएको खेलमा इङ्गल्यान्डले वेस्ट इन्डिजलाई ८ विकेटले हराएको हो ।
वेस्ट इन्डिजले दिएको एक सय ८१ लक्ष्य इङ्गल्यान्डले १७ ओभर ३ बलमा मात्र २ विकेट गुमाएर पूरा गर्यो। इंग्ल्यान्डका ओपनर फिल साल्ट ४७ बलमा ७ चौका र ५ छक्कासहित ८७ रनमा अविजित रहे । यस्तै, जोनी बेयरिस्टो ४८ रनमा अविजित रहदा जस बटलरले २५ र मोइन अलीले १३ रनको योगदान दिए ।
वेस्ट इन्डिजका आन्द्रे रसेल र रोस्टन चेसले १/१ विकेट लिए ।
टस हारेर पहिले ब्याटिङको निम्तो पाएको वेस्ट इन्डिजले निर्धारित २० ओभरमा ४ विकेट गुमाएर एक सय ८० रन बनाएको थियो । वेस्ट इन्डिजका लागि जोनसन चार्ल्सले ३८, निकोलस पुरन र रोभम्यान पावेलले ३६/३६ रन बनाए । ब्रान्डन किङ २३ रनमा रिटार्यड हर्ट भए । यस्तै, शेरफेन रदरफोर्ड २८ र रोमारियो शेफर्ड ५ रनमा अविजित रहे ।
इंग्ल्यान्डका जोफ्रा आर्चर, अदिल राशिद, मोइन अली र लियाम लिभिङस्टोनले १/१ विकेट लिए । वेस्ट इन्डिजको जारी विश्वकपमा पहिलो हार हो ।
दोस्रो चरणको समूह–२ मा रहेको इङ्गल्यान्ड दुई अङ्कसहित तालिकाको पहिलो स्थानमा छ । समान अङ्क जोडेको दक्षिण अफ्रिका दोस्रो स्थानमा छ । दक्षिण अफ्रिकाले आयोजक अमेरिकालाई १८ रनले हराएको थियो । पहिलो खेलमा पराजित भएका वेस्ट इन्डिज र अमेरिका क्रमश: तेस्रो र चौथो स्थानमा छन् ।
