काठमाडौँ । काठमाडौँ महानगरपालिकामा १८ हजार बढी विद्यार्थीले छात्रवृत्ति पाएका छन् ।
महानगरभित्रका विभिन्न ४७३ विद्यालयमा कक्षा १० सम्म अध्ययन गर्ने१ लाख ४९ हजार ९५० जना विद्यार्थी मध्ये चालु शैक्षिक सत्रका लागि १८ हजार ४२२ जनाले छात्रवृत्ति प्राप्त गरेका महानगरपालिकाले जनाएको छ ।
अनिवार्य तथा नि:शुल्क शिक्षा सम्बन्धी ऐन २०७४ शिक्षा नियमावली, २०५०,कामपा शिक्षा ऐन २०७५ तथा शिक्षा व्यवस्थापन नियमावली २०७४ अनुसार महानगरपालिका भित्र सञ्चालित सबै संस्थागत विद्यालयले कम्तीमा १० प्रतिशत छात्रवृत्ति रीतपूर्वक विद्यार्थीलाई वितरण गर्नुपर्ने व्यवस्था छ। सोही व्यवस्था कार्यान्वयन गराउन पटक पटक महानगरले अनुरोध गर्दा ४७३ संस्थागत विद्यालयका १८ हजार ४२२ जनाले छात्रवृत्ति पाएको महानगरपालिकाले जनाएको छ ।
महानगरपालिकाले बिहीबार एक सूचना जारी गर्दै छात्रवृत्ति विवरण पेस हुन बाँकी रहेका विद्यालयलाई तीन दिनभित्र छात्रवृत्ति विवरण उपलब्ध गराउन अनुरोध गरेको छ ।
महानगरले तीन दिनभित्र माग भएको विवरण पेस नगर्ने विद्यालयहरूलाई शैक्षिक सत्र २०८१ मा सञ्चालनमा नरही बन्द विद्यालयको रूपमा अभिलेखीकरण गरिने चेतावनी दिएको छ ।
