एजेन्सी । आईपीएल २०२४ रिंकु सिंहका लागि खास रहेन । तर, यसका बाबजुद कोलकाता नाइट राइडर्सले उपाधि जित्न सफल भयो । यसै क्रममा रिंकु सिंहले आईपीएलमा आफ्नो लगातार खराब फर्मको मार झेल्नु परेको थियो ।
रिंकुले टी–२० विश्वकपको लागि भारतीय टोलीमा स्थान पाएनन् । तर, यी ब्याट्सम्यानलाई निश्चित रूपमा रिजर्भ खेलाडीको रुपमा राखिएको छ । आईपीएल जितेपछि र टी–२० विश्वकपमा जानुअघि रिंकु सिंहले धेरै विषयमा आफ्नो धारणा राखेका थिए ।
जब रिंकु सिंहलाई आईपीएलको पारिश्रमिकबारे सोधिएको थियो, उनले भने – ‘यो ५५ लाख रुपैयाँ मेरो लागि धेरै हो, म हुर्किँदा ५–१० रुपैयाँ कसरी कमाउन सक्छु भन्ने सोच्थें तर अहिले मेरो आईपीएलको तलब ५५ लाख छ जुन मेरो अनुसार धेरै हो । भगवानले जे दिनुहुन्छ त्यसैमा खुसी हुनुपर्छ भन्ने मेरो मान्यता हो ।’
कोलकाता नाइट राइडर्सले रिंकु सिंहलाई ५५ लाखमा राखेको छ । क्रिकेटका दिग्गज र फ्यानहरू रिंकु सिंहको मूल्य करोडौंमा हुनुपर्छ भन्ने विश्वास गर्छन् । ५५ लाख रिंकु सिंहलाई न्याय नभएको उनीहरु ठान्छन् ।
यसका साथै रिंकुले भारतीय टोलीका कप्तान रोहित शर्मालाई लिएर आफ्नो धारणा राखे । उनले रोहित शर्माले युवा खेलाडीलाई धेरै समर्थन गर्ने बताए ।
