काठमाडौं । भीआइपीले आफ्नो मर्यादा ख्याल नगर्दा बिमानस्थलमा सुरक्षा चुनौति बढेको एक प्रतिबेदनमा उल्लेख गरिएको छ । त्रिभूवन अन्तराष्ट्रिय विमानस्थलबाट बाहिरिएको करिब ६१ केजी सुन बरामद भएपछि गत भदौमा सरकारले विमानस्थलको सुरक्षा सुदृढीकरणका लागि राष्ट्रिय सुरक्षा सल्लाहकार शंकरदाश वैरागीको नेतृत्वमा समिति गठन गरेको थियो। समितिले तयार पारेको प्रतिवेदन कार्यान्वयनका लागि सरोकारवालाबीचको छलफलमा सुरक्षा अबस्थाको बिश्लेषण गरिएको छ ।
उपप्रधान एवं गृहमन्त्री रवि लामिछानेको उपस्थितीमा भएको छलफलमा गृह मन्त्रालय ,अर्थ मन्त्रालय , संस्कृति, पर्यटन तथा नागरिक उड्डयन मन्त्रालयका सचिबहरु नेपाल प्रहरीर सशस्त्र प्रहरी बलका महानिरीक्षक, नेपाल नागरिक उड्डयन प्राधिकरणकामहानिर्देशक, नेपाल वायुसेवा निगमका महाप्रबन्धक, अध्यागमन विभागका महानिर्देशक, अध्यागमन कार्यालय त्रिभुवन विमानस्थल, भन्सार कार्यालय त्रिभुवन विमानस्थलका प्रतिनिधिहरुको सहभागीता रहेको थियो । प्रतिवेदनमा नेपाल प्रहरीको छुट्टै हवाई सुरक्षा सेवा गठन गर्न, विमानस्थलबाट निजी क्षेत्रका सुरक्षा गार्ड हटाउन, दुई वर्षभन्दा बढी कार्यरत कर्मचारीलाई सरुवा गर्न, आधुनिक उपकरण र डिटेक्टरको व्यवस्था गर्न, कुटनीतिक कार्गो जाँच गर्ने प्रणालीलाई थप प्रभावकारी बनाउन, विमानस्थलको एकीकृत इन्टलिजेन्स् बनाउन, अध्यागमन ऐन र नियमावली समय सापेक्ष संशोधन गरी विमानस्थलको प्राविधि सुधारलगायत पक्षमा सुझाव दिएको छ।
छलफलमा उपप्रधान एवं गृहमन्त्री लामिछानेले तत्काल प्रतिवेदन कार्यान्वयन गर्न निर्देशन दिदै विमानस्थलमा रहेका निकायबीच प्रभावकारी समन्वय र सहकार्य गर्न, एक अर्कालाई दोषारोपण नगर्न आग्रह गर्नुभयो । उहाँले त्रिभुवन विमानस्थलको भीआइपी कक्ष प्रयोग नगर्न गृह मन्त्रालयका अधिकारीलाई आग्रह गर्दे नागरिकलाई चार घण्टा कुराएर आफू चार मिनेटमा छिर्ने प्रवृत्ति न्यूनीकरण गर्नुपर्ने बताउनु भयो । छलफलमा त्रिभुवन विमानस्थलमा कार्यरत प्राय: सबै निकायका प्रतिनिधिले भीआइपीको स्पष्ट मापदण्ड बनाउन र उनीहरुको आगमन र प्रस्थान व्यवस्थित गर्न आत्यावश्यक रहेको औंल्याउनु भएको थियो।
छलफलमा सुरक्षा वा अन्य व्यवस्थापनको बहानामा यात्रुलाई हैरानी र सास्ती दिने प्रवृत्ति अन्त्य गर्न जोड दिईएको छ । गृहमन्त्री लामिछानेले तत्कालै परिवर्तनको अनुभूति गर्ने गरी नागरिकलाई सुरक्षा र सेवा दिन निर्देशन दिदै नागरिकलाई सेवा दिने, अन्तर्राष्ट्रिय पहिचान स्थापित हुने र सुरक्षाजस्तो संवेदनशिल विषयमा बजेटको अभाव छ भनेर नपन्छिन आग्रहगर्नुभयो । एकातिर भएको बजेट खर्च गर्न नसक्ने र अर्कातिर बजेट नै छैन भन्ने नियमित काम पनि सार्ने दोहोरो प्रवृत्ति नदेखाउन उहाँले सुझाव दिनुभयो । उहाँले प्रतिवेदनका सुझाव कार्यान्वयनमा रचनात्मक हुन आग्रह। निर्देशनको पखाई भन्दा पनि समस्याको सही पहिचानसहित साना–साना कामबाट सुधार प्रारम्भ गर्न अनुरोध गर्नुभयो ।
