एजेन्सी । रोयल च्यालेन्जर्स बैंगलोरका स्टार ब्याट्सम्यान विराट कोहली र कोलकाता नाइट राइडर्सका प्रशिक्षक गौतम गम्भीरबीचको लामो समयदेखि चलिरहेको दुश्मनी केकेआर र आरसीबीको खेलमा टुंगिएको छ ।
म्याचको ब्रेकमा गम्भीर र विराट एकअर्कालाई अँगालो हालेको देखिएका थिए । यति मात्र होइन, दुवैबीच केही कुराकानी भयो, त्यसपछि गम्भीर र कोहलीको अनुहारमा मुस्कान पनि देखियो ।
कमेन्टेटर रवि शास्त्री र सुनील गावस्करले पनि कमेन्ट्री बक्समा यो क्षणलाई लिएर निकै रमाइलो गरेका थिए ।
खेलको क्रममा गौतम गम्भीरले विराट कोहलीलाई अँगालो हाल्दा कमेन्ट्री बक्समा बसेका रवि शास्त्रीले ठट्टा गर्दै भने, ‘विराट कोहली र गौतम गम्भीरबीचको अँगालोको लागि फेयर प्ले अवार्ड केकेआरलाई दिनुपर्छ ।’
शास्त्रीको टिप्पणीपछि सुनिल गावस्करले पनि यो घटनाको मजा लिन छोडेनन् । उनले भने, ‘फेयरप्ले अवार्ड मात्र होइन, ओस्कार अवार्ड पनि दिनुपर्छ ।’
आईपीएल २०२३ मा विराट कोहली र गौतम गम्भीरबीच चर्को विवाद भएको थियो । वास्तवमा कोहली र नवीन उल हकबीच शब्दको युद्ध भएको थियो । खेलपछि कोहली र गौतम गम्भीरबीच यो विवादलाई लिएर निकै खैलाबैला भएको थियो । स्थिति यति खराब बनेको थियो कि अन्य खेलाडीहरूले यी दुईलाई रोक्नुपरेको थियो ।
