काठमाडौँ । इन्टरपोलबाट रेड नोटिस जारी भएका फरार प्रतिवादी कुवेतबाट पक्राउ परेका छन् ।
लागु औषध मुद्दामा फरार रहेका इलाम संगरुम्बा-५ का २९ वर्षीय रोशन राईलाई इन्टरपोलमार्फत पक्राउ गरी बिहीबार काठमाडौं फिर्ता ल्याइएको नेपाल प्रहरीले जानकारी दिएको छ।
ईलाम नगरपालिका का २५ वर्षीय विकास बसेल समेत ३ जनालाई प्रहरीले अवैध लागु औषध खैरो हेरोइन ३७ ग्राम ५ सय मिलिग्राम र डिजिटल तराजु १ थानसहित गत साउन २६ गते पक्राउ गरेको थियो ।
अनुसन्धानको क्रममा उक्त लागुऔषधको कारोबारमा रोशन राई समेतको संलग्नता रहेको पाईएपछि नेशनल सेन्ट्रल व्यूरो (एनसिबी) काठमाडौँको अनुरोधमा इन्टरपोल महासचिवालयबाट यही पुस २५ गते उनी विरुद्ध रेड नोटिस जारी भएको थियो । इन्टरपोल कुवेतसँग समन्वय गरी कारबाहीका लागि उनलाई नेपाल ल्याइएको हो।
उनलाई आवश्यक अनुसन्धान तथा कारबाहीको लागि लागु औषध नियन्त्रण ब्यूरो पठाईएको छ ।
