काठमाडौँ । नेपाली कांग्रेसले प्रतिनिधिसभाका १० वटा विषयगत समितिको संयोजक तोकेको छ । शुक्रबार बसेको कांग्रेस संसदीय दलको बैठकले समितिको संयोजक तोकेको प्रमुख सचेतक रमेश लेखकले जानकारी दिए ।
अन्तर्राष्ट्रिय सम्बन्ध र पर्यटन समितिको संयोजकमा नारायण खड्का, उद्योग वाणिज्य तथा श्रम रोजगार उपभोक्ता हितमा रमा कोइराला पौडेल, अर्थ समितिमा रामनाथ अधिकारी, कानुन न्याय तथा मानवअधिकारमा नागिना यादव, कृषि सहकारी तथा प्राकृतिक श्रोत समितिमा कुशुमदेवी थापा तोकिएका छन् ।
त्यसैगरी, राज्य व्यवस्था सुशासन समितिमा दीलेन्द्र प्रसाद बडू, पूर्वाधार विकास समितिमा दिनेशकुमार यादव, शिक्षा स्वास्थ्य तथा सूचनामा लिलादेवी बोकिम, महिला तथा सामाजिक मामिला आशा विक, र सार्वजनिक लेखा समितिमा श्यामकुमार घिमिरे संयोजक तोकिएका नेता लेखकले जानकारी दिए ।
पार्टी विधान अनुसार समावेशिताको सिद्धान्तअनुसार संयोजक तोकिएको उनले बताए । उनले भने, ‘‘चाँडै निर्वाचन गर्न कांग्रेस केन्द्रीय समितिलाई निर्वाचन समिति तोक्न आग्रह गरेका छौँ । आउँदो केन्द्रीय समिति बैठकले निर्वाचन समिति तोक्छ । त्यसपछि निर्वाचनबाट कार्यसमितिको संसदीय दलको कार्यसमितिले पूर्णता पाउँछ ।’
