एजेन्सी । नितिश कुमारले बिहारको मुख्यमन्त्री पदबाट राजीनामा दिएर बिहारसँगै राष्ट्रिय राजनीतिमा हलचल मच्चाएका छन् । नितिशको राजीनामापछि अहिले उनको पार्टी जेडीयूले एनडीएसँग मिलेर सरकार बनाउने चर्चा छ ।
नितिशको राजीनामासँगै बिहारमा महागठबन्धन पनि टुटेको छ । योसँगै विपक्षी इन्डी गठबन्धनलाई पनि ठूलो झट्का लागेको छ । नितिशले भाजपासँग हात मिलाउने चर्चा छ । जसका कारण मोदी सरकारलाई चुनौती दिन केही महिनाअघि इन्डी गठबन्धनमा एकता भएका ठूला विपक्षी दलहरूले घाटा बेहोर्नुपरेको छ ।
बिहारमा महागठबन्धनले लोकसभा चुनाव सँगै लडेर भाजपालाई कडा टक्कर दिने प्रयास गरिरहेको थियो । तर, अब नितिश यस गठबन्धनबाट अलग भएपछि बिहारमा जेडीयूसँग चुनाव लड्ने कांग्रेस र राजदको सपना पनि चकनाचुर भएको छ । नितिशको यो निर्णयले लोकसभा चुनावमा इन्डी गठबन्धनलाई ठूलो नोक्सान पुर्याउन सक्छ ।
नितिश कुमार बाहिरिएपछि इन्डी गठबन्धन कमजोर भएको छ । गत वर्ष मतभिन्नतालाई पन्छाएर एकजुट भएका सबै विपक्षी दलहरूलाई अब भाजपासँग प्रतिस्पर्धा गर्न निकै गाह्रो हुनेछ । विपक्षी दललाई एकताबद्ध गराउन नितिशले महत्वपूर्ण भूमिका खेलेका थिए ।
गत हप्तादेखि इन्डी गठबन्धनमा आन्तरिक विवाद चलिरहेको थियो । नितिशअघि बंगालकी मुख्यमन्त्री ममता बनर्जीले एक्लै चुनाव लड्ने कुरा गरेकी थिइन् । त्यस्तै, पञ्जाबमा पनि कांग्रेस र आम आदमी पार्टीबीच सिटको विषयमा वार्ता भएको छैन ।
