काठमाडौँ । जारी प्रधानमन्त्री कपमा विभागीय टोली त्रिभुवन आर्मी क्लबले कर्णाली प्रदेशलाई जितका लागि दुई सय ८० रनको विशाल लक्ष्य दिएको छ ।
कीर्तिपुरस्थित टियू क्रिकेट मैदानमा टस हारेर पहिले ब्याटिङको निम्तो पाएको आर्मीले निर्धारित ५० ओभरमा पाँच विकेट गुमाएर दुई सय ७९ रन बनायो ।
आर्मीके लागि कप्तान विनोद भण्डारी शतकीय ईनिङ खेले । १३२ बलको सामना गरेका विनोदले तीन छक्का र ६ चौका प्रहार गर्दै एक सय रन बनाए । उनले अन्तिम ओभरको अन्तिम बलमा शतक पुरा गरेका हुन्।
यस्तै, बसिर अहमदको उत्कृष्ट अर्धशतकीय पाली खेले । केवल दुई रनका कारण शतक पुरा गर्नबाट चुकेका बसिर ९२ बलमा एक छक्का र १२ चौका प्रहार गर्दै ९८ रनमा अविजित रहे ।
त्यसैगरी, भीम सार्कीले २५ रन बनाउदा कुशल मल्लले २१, सन्तोष कार्कीले ११, विवेक यादवले ६ र इमरान शेखले ५ रन थपे ।
कर्णालीको लागि दीपेन्द्र रावतले दुई तथा प्रकाश जैसी, दिनेश अधिकारी र दिवान पुनले एक–एक विकेट लिए ।
