मुस्ताङ । धुम्बा ताल मुस्ताङ जिल्लाको एउटा दुर्लभ एवं रहस्यमय रत्न हो । निलगिरी हिमालको काखमा अवस्थित धुम्बा तालको पानीको रङ्ग हरित मणिजस्तो छ । निलगिरी पर्वत शृंखलाबाट बगेको पानी यो तालमा आइपुगेको छ । यो समुद्र सतहबाट २९०० मिटरको उचाईमा छ । यो ताल पवित्र बौद्ध तालका रुपमा पनि निकै प्रसिद्ध छ । यो ताल जोमसोमबाट करिब पाँच किलोमिटर पश्चिम ठिनी गाउँमा रहेको छ । यसको लम्बाई १५० मिटर र चौडाई १०० मिटरको हाराहारीमा छ ।
स्थानीयवासीका अनुसार यो तालको पानी एक पटक आफैं रातो भएको थियो । पछि, बौद्ध धर्मगुरुहरुले पूजापाठ गरेर पानीको रङ्ग पुरानै अवस्थामा ल्याएको किंवदन्ती छ । यसबाहेक, यस तालमा पाइने माछा कसैले खानु हुँदैन भन्ने धार्मिक मान्यता छ । धेरै बौद्ध धर्मावलम्बीहरु यस तालमा आफ्नो मनोकाँक्षा पूरा हुने आशामा वर्षैपिच्छे यहाँ आइपुग्छन् । तालको वरिपरि बौद्धमार्गीका तुल, ध्वजापताका देख्न सकिन्छ ।
आजभोलि प्रसिद्ध धार्मिक तिर्थस्थल मुक्तिनाथ पुग्ने पर्यटक एवं श्रद्धालुका लागि धुम्बातालको भ्रमण थप आकर्षण हुने गरेको छ । धुम्बाताल आफैंमा उत्कृष्ट छँदैछ, तर यहाँबाट देखिने वरिपरिको अदभूत दृश्यावलोकनले सबैका मनमस्तिष्कलाई प्रफुल्लित बनाउँछन् ।
हिउँदका दिनहरुमा यो तालको पानी पूरै जमेको हुन्छ, र मानिसहरु तालको बीच भागतिर आइसमा चिप्लेटी खेलिरहेका हुन्छन् । पर्यटन व्यवसायीका अनुसार यो ताल नेपाली युवापिंढीका लागि जेरीका नामले पनि परिचित छ किनभने यो ताललाई “जेरी” फिल्ममा पनि छायाँकन गरिएको छ ।
तस्वीरहरुः सन्तोष केसी
