एजेन्सी । इंग्लिस प्रिमियर लिग फुटबल अन्तर्गत एस्टन भिल्लाले जित निकालेको छ । गएराति भएको खेलमा भिल्लाले बर्नलेलाई ३–२ गोलले पराजित गरेको हो ।
खेलको २८ औं मिनेटमा लिओन बेलीले गोल गर्दै घरेलु टोली भिल्लालाई सुरुवाती अग्रता दिलाएका थिए । त्यसको दुई मिनेटपछि नै जेकी अमोडीनीले गोल गर्दै बर्नलेलाई १–१ गोलको बराबरीमा ल्याए ।
४२ औं मिनेटमा मोउसा डियावेको गोलबाट भिल्लाले खेलमा २–१ को अग्रता लियो । यता, ७१ औं मिनेटमा लिले फोस्टरले गोल गर्दै बर्नलेलाई २–२ गोलको बराबरीमा ल्याए । खेलको ८९ औं मिनेटमा डुग्लास लुइजले पेनाल्टीमा गोल गर्दै एस्टन भिल्लालाई जित दिलाए ।
जितसँगै भिल्ला तालिकाको दोस्रो स्थानमा उक्लिएको छ । उसको २० खेलबाट ४२ अंक छ । पराजित बर्नले ११ अंकसहित १९ औं स्थानमा छ ।
