एजेन्सी । एकदिवसीय विश्वकप २०२३ मा भारत र पाकिस्तानबीच भिडन्त भइरहेको थियो । खेलमा भारतले टस जितेर पहिले बलिङ गर्ने निर्णय गरेको थियो । पाकिस्तानका लागि इमाम उल हक र अब्दुल शफिकले उत्कृष्ट सुरुवात गरेका थिए । मोहम्मद सिराजले ८ औं ओभरमा अब्दुल शफिकलाई आउट गर्दै भारतलाई पहिलो सफलता दिलाए ।
यसपछि भारतका स्टार अलराउन्डर हार्दिक पाण्ड्याले पाकिस्तानलाई दोस्रो झट्का दिए । हार्दिकले इमामलाई विकेटकिपर केएल राहुलको हातमा क्याच आउट गराएर पेभिलियनको बाटो देखाए ।
यस क्रममा हार्दिक पाण्ड्याको भिडियो र तस्बिर सामाजिक सञ्जालमा निकै भाइरल भइरहेका छन्, जसमा उनी बलिङ गर्नुअघि मन्त्र जप गरिरहेको देखिन्छ । यति मात्र होइन, इमामलाई आउट गरेपछि हार्दिकको ‘बाई–बाई सेलिब्रेसन’ भाइरल भइरहेको छ ।
इमामको आउट भएपछि हार्दिक पाण्ड्याले विशेष तरिकाले सेलिब्रेट गरेको देखियो । इमामको विकेट लिएपछि हार्दिकले उनलाई रोमाञ्चक ढंगमा अलविदा गर्दै पेभिलियनको बाटो देखाए । खेलमा इमामले ३८ बलमा ३६ रन बनाउन सके ।
जानकारीका लागि यो खेल भारतले ७ विकेटले जितेको थियो । पाकिस्तानले दिएको १९२ रनको लक्ष्य भारतले ३०.३ ओभरमा ३ विकेटको क्षतिमा भेट्टाएको थियो ।
