काठमाडौँ । नेपाली काँग्रेसले इजरायलमा रहेका नेपालीहरुलाई तत्काल उद्धार गरी सुरक्षित रुपमा स्वदेश फिर्ता गर्न सरकारलाई आग्रह गरेको छ ।
मंगलवार नयाँ बानेश्वरस्थित संघीय संसद भवनमा बसेको काँग्रेस संसदीय दलको बैठकले इजरायलमा रहेका नेपालीहरुलाई सुरक्षित रुपमा स्वदेश फर्काउन सरकारलाई आग्रह गरेको हो ।
बैठकपछि सञ्चारकर्मीहरुसँग कुराकानी गर्दै प्रमुख सचेतक रमेश लेखकले नेपाल आउन चाहाने नागरिकहरुलाई तत्काल उद्धार गरेर सुरक्षित स्वदेश फिर्ताको लागि आवश्यक व्यवस्था मिलाउन सरकारलाई आग्रह गरिएको बताउनु भयो । त्यस्तै गरी युद्धमा परि बेपत्ता भएका नेपाली नागरिकहरुलाई खोजि गरेर उहाँको स्थितिलाई सार्वजनिक गर्न पनि आग्रह गरिएको छ । बैठकले इजरायलमा जोखिममा परेका मानिसहरुलाई उद्दार गरेर सुरक्षित स्थानमा राख्न, खान, बस्नको उचित व्यवस्था गर्न र हत्या भएका विद्यार्थीहरुको पार्थिव शरीरलाई तत्काल नेपाल ल्याएर परिवारजनलाई बुझाउन पनि सरकारको ध्यानाकर्षण गराएको छ ।
प्रमुख सचेतक लेखकले भन्नुभयो – ‘आजको बैठकबाट दश जना हत्या भएका नेपाली विद्यार्थीहरुमा श्रद्धाञ्जली व्यक्त गर्दै शोक प्रश्ताव पारित गरेका छौँ । उहाँहरुको परिवारलाई समवेदना व्यक्त गरेका छौँ । सरकारको केही विषयमा ध्यानाकर्षण गराएका छौँ, जोखिममा परेका मानिसहरुलाई उद्दार गरेर सुरक्षित स्थानमा राख्ने, उनीहरुका लागि खान, बस्न उचित व्यवस्था गर्ने, हत्या भएका १० जना होनाहार नेपाली विद्यार्थीको पार्थिव शरीरलाई तत्काल नेपाल ल्याउने र परिवारजनलाई बुझाउने ।
यसका साथसाथै जो मानिसहरु बेपत्ता भएको अथवा सम्पर्कमा नरहेको अवस्था छ, तत्काल उहाँहरुको खोजि गरेर उहाँको स्थितिलाई सार्वजनिक गर्ने र नेपाल आउन चाहने नागरिकहरुलाई तत्काल उद्धार गरेर सुरक्षित स्वदेश फिर्ताको आवश्यक व्यवस्था मिलाउनका लागि आजको बैठकले सरकारलाई ध्यानाकर्षण गराएको छ । अनुरोध गरेको छ । हत्या भएका नेपाली नागरिकहरुको दिवंगत आत्माको चिर शान्तिको कामना गर्दै हार्दिक श्रद्धाञ्जली व्यक्त गरेका छौँ । शोक प्रश्ताव पारित गरेका छौँ ।’
बैठकले हत्या भएका नागरिकहरुलाई श्रद्धाञ्जली र परिवारजनमा समवेदना व्यक्त गरेको छ ।
