एजेन्सी । भारतीय क्रिकेट कन्ट्रोल बोर्ड (बीसीसीआई)ले विश्वकपमा भारत–पाकिस्तान खेलका लागि थप १४ हजार टिकट जारी गर्ने भएको छ ।
आइतबार दिउँसो १२ बजेदेखि नै फ्यानले विश्वकपको आधिकारिक टिकट वेबसाइटमा गएर यी टिकटहरू खरिद गर्न सक्नेछन् । बोर्डले शनिबार राति सो जानकारी दिएको हो ।
अक्टोबर १४ मा अहमदाबादको नरेन्द्र मोदी स्टेडियममा हुने खेलका लागि थप टिकटहरू जारी गरिने बोर्डले जनाएको छ ।
फ्यानहरुको असन्तुष्टिपछि बोर्डले तेस्रो पटक टिकट जारी गर्ने निर्णय गरेको हो । भारतीय बोर्डले विश्वकप सुरु हुनुअघि अगस्टको अन्त्यमा ४ लाख विश्वकप टिकट जारी गरेको थियो, जुन केही मिनेटमै बिक्री भइसकेको थियो । यस्तो अवस्थामा फ्यानहरु रिसाए र सामाजिक सञ्जालमा बोर्डको आलोचना गर्न थाले ।
भारतको विश्वकप खेलका लागि टिकटहरू विभिन्न ६ चरणमा बिक्री भएको थियो, तर टिकट बिक्री सुरु भएको केही मिनेटमै सबै टिकटहरू बिक्री भइसकेका छन् । सेप्टेम्बर ३ मा भारत–पाकिस्तान खेलको टिकट बिक्री भएको थियो ।
पहिले टिकट बिक्री वेबसाइटको होम स्क्रिन रिफ्रेस गरिरहे र त्यसपछि सबै टिकट बिक्री भइसकेको जानकारी दिइयो । यस्तो अवस्थामा धेरै फ्यानले टिकट काट्ने मौका पनि पाउन सकेनन् ।
