काठमाडौं: बाँके जिल्लाको नेपालगञ्ज लगायत देशका केही स्थानमा भएका घटनाप्रति मुस्लिम आयोगले दु:ख प्रकट गरेको छ ।
आयोगका अध्यक्ष समिम मियाँ अन्सारीले आज एक विज्ञप्ति जारी गर्दै समाजमा शान्ति र अमनचयन कायम गरी सबै धर्म एवं समुदायहरुको आस्थाप्रति सम्मान व्यक्त गर्न तथा सामाजिक सदभाव कायम राख्न र धार्मिक सहिष्णुता बचाइ राख्न अपिल गर्नु भएको छ ।
विज्ञप्तिमा कानुनको उल्लंघन गरी धार्मिक सहिष्णुता खल्बल्याई समाजका अशान्ति सिर्जना गर्ने व्यक्ति एवं समूहहरुको पहिचान गरी कानुनी कारबाहीको दायरामा ल्याउन सरकारको गम्भीर ध्यानाकर्षण गराएको उल्लेख छ ।
शदीयौंदेखिको सामाजिक सदभाव विथोल्ने कार्यमा केही उच्छृङ्खल व्यक्तिहरु संलग्न रहेको पनि आयोगको भनाई छ ।
