काठमाडौं । राष्ट्रिय टोलीका स्टार स्ट्राइकर विमल घर्तीमगर पनि उज्वल भविष्यको लागि विदेश पलायन भएका छन् ।
एक दशक भन्दा लामो समयदेखि राष्ट्रिय टोलीबाट खेलेका विमल शुक्रबार अस्ट्रेलिया गएका हुन् । राष्ट्रिय टीमका महत्वपूर्ण खेलाडी विमलको यो पलायन नेपाली फुटबलमा गम्भीर धक्का परेको छ ।
उनले सन् २०१२ मा बंगलादेशविरुद्धको मैत्रीपूर्ण खेलमा डेब्यु गरेका थिए। उनी मच्छिन्द्र क्लबबाट सहिद स्मारक ए डिभिजन लिग खेलेका छन्। नेपालले विमलको कप्तानीमा २०१५ मा आयोजना भएको पहिलो यु १९ साफ च्याम्पियनसिप जितेको थियो ।
राष्ट्रिय टीमबाट सबैभन्दा कम उमेरमा गोल गर्ने किर्तिमान पनि उनको नाममा छ । विमलले १४ वर्षको उमेरमा डेब्यू गरेका थिए भने १५ वर्षमा पहिलो गोल गरेका थिए ।
अस्ट्रेलिया जानुअघि उनले नेपाली राष्ट्रिय टीमका प्रशिक्षकलाई जानकारी गराएका थिए र आफूलाई राष्ट्रिय टीममा समावेश नगर्न आग्रह गरेका थिए ।
पछिल्लो समयमा करिब तीन दर्जन फुटबलरहरु अस्ट्रेलिया पलायन भइसकेका छन् ।
