काठमाडौं । नेपाली काँग्रेसका सभापति एवं प्रमुख विपक्षी दलका नेता शेरबहादुर देउवाले अहिलेको सबै समस्या प्रधानमन्त्रीको दम्भले गर्दा भएको आरोप लगाएका छन् ।
उनले प्रश्न गरे- के आज सरकार सञ्चालनको जिम्मा लिएकाहरुबाट नेपाली जनताले ल्याएको संविधान सुरक्षित छ ? तीन वर्षअघि एमाले र माओवादीको गठबन्धनबाट दुई तिहाइको सरकार गठन भएको थियो । तर आज तीन वर्ष पुग्दा नपुग्दै विश्वासको मत लिनुपर्ने अवस्था आएको छ ।
यो सबै प्रधानमन्त्री ओलीका कारण भएको हो- देउवाले भने । यो सरकारलाई काम गर्न कसले रोकेको छ ? प्रमुख प्रतिपक्षीले कहिले केमा असहयोग गर्यो ? उनले प्रश्न गरे । उनले भने ओलीको सरकार पूर्णत असफल भएको छ ।
उनले प्रधानमन्त्रीलाई प्रश्न गरे आफूले काम गर्न नसक्ने अरुलाई दोष दिने ? सभापति देउवाले भने, प्रधानमन्त्री जिम्मेवारीबाट भाग्न सक्नुहुदैन । एक पटक छातीमा हात राखेर आफूले आफैलाई सोध्नुस त यो समस्या तपाइकै कारणले सिर्जना भएको होइन ? यो सरकारले औषधि र खोपमै भ्रष्टाचार गरेर निर्लज्ज काम गरेको छ ।
औषधि मूलो नपाएर नेपाली छटपटाएका छन्, तर सरकार भने गत वर्ष स्वास्थ्य सामग्रीमा र अहिले खोपमा भ्रष्टाचार गरेको छ । जनता मरेको मर्यै गरेका छन्, औषधि छैन तर सरकार टुलुटुलु हेरेर बसेको छ, अनि प्रधानमन्त्री आफ्नो प्रशंसाको आत्मरतिमा रमाएका छन्, यो निर्लज्ज काम हो, उनले भने ।
