एजेन्सी । ‘ओ माई गड २’ जस्ता हिट फिल्म दिएका अभिनेता पंकज त्रिपाठीका बुवा पण्डित बनारस तिवारीको निधन भएको छ ।
९९ वर्षीय पण्डितको आफ्नै गाउँ बेलसण्डमा निधन भएको हो । उनको उमेर सम्बन्धी रोगका कारण निधन भएको बताइएको छ । अभिनेता पंकज त्रिपाठी बिहारको गोपालगञ्जस्थित आफ्नो गाउँमा बुवाको अन्तिम दर्शनका लागि मुम्बई छाडेर त्यसतर्फ लागेका छन् ।
उनको परिवारका बीचमा आज अन्तिम संस्कार गरिने बताइएको छ । पंकज त्रिपाठी अहिले आफ्नो गाउँ गोपालगञ्ज जाँदैछन् ।
पंकज आफ्नो बुबासँग धेरै नजिक थिए, जब फिल्मबाट ब्रेक पाउँछन्, उनी आफ्नो गाउँ गएर आफ्ना आमाबुवासँग समय बिताउने गर्दथे । यस क्रममा पंकजले धेरै पटक आफ्ना बुवासँगको तस्बिर सामाजिक सञ्जालमा सेयर गरेका छन् ।
पंकज त्रिपाठीले एक अन्तर्वार्तामा भनेका थिए कि उनका बुवा एक पटक मात्र मुम्बई आएका थिए । उनलाई यहाँका ठूला घर र भवनहरू मन परेनन् । पंकज त्रिपाठीले भनेका थिए कि उनका बुबा कहिल्यै कुनै थिएटरमा फिल्म हेर्न गएनन् । घरमा पनि छोराको फिल्म कसैले टिभी वा कम्प्युटरमा देखाएमा मात्रै हेर्ने गर्थे ।
