समाचारमा आए अनुसार आज एमालेको माधव नेपाल समूहका सांसदहरुको सामूहिक राजीनामा दिने भनेका थिए । एमाले अध्यक्ष केपी शर्मा ओलीले २०७५ जेठ २ मा फर्कने प्रतिवद्धता नजनाए आजै राजीनामाको तयारी खनाल– नेपाल समूहले गरेको थियो ।
तर अन्तिममा आएर अलमलमा परेको छ । समय घर्कंदै गयो तर प्रधानमन्त्री ओली र बरिष्ठ नेता माधवकुमार नेपालबीचको वार्ता सकिएन ।
भनिएअनुसार चपलीहाइटस्थित एक व्यापारीको घरमा अहिलेसम्म नै वार्ता जारी छ ।
वार्ताेका बारेमा त त्यति थाहा पाएनौँ तर हामी भने संसद सचिवालयमा कुरिरहेका थियौँ, सचिवालयका एकजना कर्मचारीले भने । उनीहरु ५ बजेसम्म कार्यालयमै बसे, राजीनामा बुझाउन कार्यालयमा कोही आएनन् अनि समय घर्किएपछि घरतिर लागे ।
माधव नेपाल समूहले ओलीलाई जेठ २ मा फर्कन बेलुका ४ बजेसम्मको अल्टिमेटम दिएको थियो तर ओली नेपालबीच २ बजेदेखि शुरु भएको वार्ताले ५ बजे नै कटाइदियो । उता नेपाल निकट सांसदहरुको राजीनामा नेता नेपालकै खल्तीमा रहेको बताइएको थियो तर त्यो पनि साथमै रह्यो ।
त्यस्तै भयो उता राष्ट्रपति कार्यालयका कर्मचारीलाई पनि । हुनत दलीय दलिल पेश गर्ने समय राति ९ बजेसम्म दिइएको थियो तर काँग्रेस–माओवादी गठबन्धनले भने समयमै अर्थात् कार्यालय समयभित्रै बहुदलीय सरकारको दाबी पेश गर्न जाने बताएको थियो ।
त्यही प्रचार मिडियामा आएपछि शीतल निवासका कर्मचारीले काँग्रेस सभापति शेरबहादुर देउवालाई कुरेका थिए । तर उनी पनि समयमा नपुगेपछि यहाँका कर्मचारीले कार्यालय समय सकिएपछि पनि देउवालाई कुरेरै बसेका छन् ।
किनभने राष्टपतिले सरकार गठनको दाबी गर्ने समय आज राति ९ बजेसम्म तोकेकोले शीतलनिवासका कर्मचारी भने आज त्यतिञ्जेल पनि बस्नुपर्ने हुन्छ ।
तर आज राति ९ बजेसम्म पनि प्रचण्ड तथा देउवा समूहले सरकार बनाउने दाबी पेश नगरेमा भने वर्तमान प्रधानमन्त्री केपी ओलीलाई नै ठूलो दलको प्रधानमन्त्री नियुक्त गर्ने तयारीमा शीतलनिवास लागेको बताइएको छ ।
