काठमाडौँ । अख्तियार दुरुपयोग अनुसन्धान आयोगले नापी कार्यालय चाबहिलमा कार्यरत नापी अधिकृत राजु पुरीमाथि १ करोडभन्दा बढी भ्रष्टाचार गरेको अभियोगमा विशेष अदालत काठमाडौँमा आरोप पत्र दायर गरेको छ ।
आयोगको अनुसन्धानबाट सार्वजनिक सेवा गरेको २०५२ पुस ९ गतेदेखि २०७९ असार मसान्तसम्मको अवधिमा पुरीको आय र खर्च तुलना गर्दा रु १ करोड ४ लाख ३ हजार ८४१ बराबरको खर्च तथा लगानीको वैधानिक स्रोत खुल्न नआएको देखिएकाले उनले सार्वजनिक सेवाको पदमा बहाल रहँदा आफ्नो पदीय हैसियतको दुरुपयोग गरी गैरकानूनी सम्पत्ति आर्जन गरेको देखिएको आयोगले जनाएको छ ।
आयोगका प्रवक्ता भोला दाहालले आज जारी गर्नुभएको प्रेस विज्ञप्तिअनुसार भ्रष्टाचार निवारण ऐन र अख्तियार दुरुपयोग अनुसन्धान आयोग ऐनअनुसार गैरकानूनीरुपमा आर्जन गरेको सम्पत्ति जफत एवं असुल हुनसमेत मागदाबी लिएको उल्लेख गर्नुभएको छ ।
