काठमाडौँ । पछिल्लो करिब एक महिनामा मनसुनजन्य विपद्बाट २५ जनाले ज्यान गुमाएको पुष्टि भएको छ भने अझै २५ जना बेपत्ता अवस्थामा छन् ।
विपद् पूर्वतयारी तथा प्रतिकार्य शाखाका अनुसार गत जेठ ३१ गतेदेखि असार २७ गतेसम्म मनसुनजन्य विपद्बाट १९ जना घाइते भएका छन् । साथै ८७ घर पूर्णरुपमा क्षतिग्रस्त भएका छन् भने १८२ घरमा आंशिक क्षति पुगेको छ ।
यस वर्षको मनसुन सुरु भएपछि बाढी तथा पहिरोका कारण भोजपुरमा एक, नुवाकोटमा एक, संखुवासभामा ३, ताप्लेजुङमा ३, पाँचथरमा ३, तनहुँमा २, गोरखामा २, ओखलढुंगामा ४, जुम्लामा १, अर्घाखाँचीमा ३, मुगुमा १ र दाङमा १ जनाको ज्यान गएको छ । साथै, बाढीपहिरोमा परी संखुवासभामा १९ , पहिरोमा परी ताप्लेजुङमा ३ र बाढीमा परी पाँचथरमा ३ जना अझै बेपत्ता अवस्थामा छन् ।
शाखाका अनुसार बाढीपहिरोमा परी संखुवासभामा ३, पहिरोका कारण ताप्लेजुङमा ३ र बाढीका कारण पाँचथरमा एक जना घाइते भएका छन् भने पहिरोमा परी तनहुँ र गोरखामा २/२ जना घाइते भएका छन् । शाखाले अछाममा १, रुपन्देहीमा १, अर्घाखाँचीमा १, बाजुरामा २, मुगुमा १, लम्जुङमा १, कैलालीमा १ गरी कुल १९ जना घाइते भएका छन् ।
