एजेन्सी । एकदिवसीय विश्वकपमा टीम इण्डियाका लागि चौथो नम्बरमा कसले ब्याटिङ गर्नेछ ? यो प्रश्न २०१९ विश्वकपअघि नै भारतीय व्यवस्थापन र चयनकर्ताका लागि टाउको दुखाइ बनेको थियो ।
करिब ६ महिनाअघि श्रेयस अय्यरलाई यही नम्बरमा खेल्ने मानिएको थियो तर उनको कमजोर फिटनेसले चयनकर्तालाई अन्य विकल्पमा विचार गर्न बाध्य बनाएको छ ।
टिम इन्डियाको अगाडि नम्बर ४ को समस्या अहिले मात्रै आएको होइन । वास्तवमा युवराज सिंहको सन्यासपछि यो समस्या कायमै छ । यस पोजिसनमा खेल्दै युवराजले २०११ को विश्वकपमा उत्कृष्ट प्रदर्शन गरेका थिए । युवीको प्रदर्शनकै आधारमा भारतले घरेलु मैदानमा विश्वकपको उपाधि उचालेको थियो ।
नम्बर ४ मा किन यति धेरै बहस ?
नम्बर–४ पोजिसनलाई कुनै पनि टोलीको ब्याटिङ अर्डरको मेरुदण्ड भनिन्छ, किनभने शीर्ष क्रम असफल भएमा स्कोर अगाडि बढाउने र टोलीलाई विघटन हुनबाट बचाउने जिम्मेवारी नम्बर–४ ब्याट्सम्यानको हुन्छ । त्यसैले यो पोजिसनमा बलियो, कुशल र अनुभवी ब्याट्सम्यान राखिन्छ, जो सबै अवस्थामा खेल्न सक्षम हुन्छ ।
यति महत्वपूर्ण भएपछि किन खाली छ नम्बर ४ को पद ?
सन् २०१९ को विश्वकपमा यो भूमिकाका लागि विजय शंकरलाई छनोट गरिएको थियो तर उनी असफल भए । यसपछि श्रेयस अय्यर यो नम्बरमा खेले तर उनी अझै घाइते छन् । अय्यर अस्ट्रेलियाविरुद्धको घरेलु टेष्ट सिरिजमा घाइते भएका थिए ।
१. अय्यर फिट हुँदा खेल्ने पक्का
श्रेयस अय्यरको प्रदर्शन नम्बर ४ मा परेका खेलाडीमध्ये उत्कृष्ट रहेको छ । पछिल्लो विश्वकपपछि अय्यर यस मैदानमा भारतका लागि सर्वाधिक रन बनाउने खेलाडी हुन् । २०१९ देखि, अय्यरले नम्बर–४ मा भारतका लागि खेलेका २२ खेलहरूमा ४७.३५ को औसतमा ८०५ रन बनाएका छन् । जसमा उनले २ शतक र ५ अर्धशतक प्रहार गरेका छन् ।
अघिल्लो वर्ष पनि अय्यर उत्कृष्ट लयमा थिए । उनले सन् २०२२ मा सर्वाधिक ७२४ रन बनाएका थिए । जसमा एक शतक र ६ अर्धशतक समावेश छ । यदि अय्यर विश्वकपअघि पूर्णरूपमा फिट भए भने यो पदका लागि चयनकर्ताको पहिलो रोजाइ हुनेछ ।
२. केएल राहुलः ६३.०० को औसतमा रन
यदि अय्यर चोटका कारण छनोट हुन नसकेमा केएल राहुललाई नम्बर–४ पोजिसनमा प्रयास गर्न सकिन्छ । पछिल्लो विश्वकपपछि केएल राहुलले ४ खेलमा ६३.०० को औसतमा १८९ रन बनाएका छन् । यसमा एक शतक पनि समावेश छ । समग्र करियरलाई हेर्दा राहुलले नम्बर ४ मा ४०.१६ को औसतमा २४१ रन बनाएका छन् । यसमा एक शतक समावेश छ ।
३. अजिंक्य रहाणेः करियरको २८.४६ प्रतिशत रन नम्बर ४ मा आएर बनाए
अजिंक्य रहाणेले विगत ५ वर्षदेखि टीम इण्डियाका लागि कुनै पनि एकदिवसीय खेल खेलेका छैनन् तर आइपिएलको अघिल्लो प्रदर्शन र हालैको फर्मका कारण उनी नम्बर ४ मा बलियो दावेदार हुन् । रहाणेले आईपीएल २०२३ मा चेन्नईबाट खेलेका १४ खेलहरूमा १७२.४९ को स्ट्राइक रेटमा ३२६ रन बनाएका छन् । जसमा दुई अर्धशतक पनि छन् । रहाणेले चेन्नईबाट मिडल अर्डरको कमान्ड लिए र शीर्ष क्रम फ्लप हुँदा धेरै पटक स्कोर अगाडि बढाए, जुन नम्बर–४ को सबैभन्दा ठूलो माग हो ।
रहाणेले करियरको २८.४६ प्रतिशत रन नम्बर ४ मा ब्याटिङ गर्दै बनाएका छन् । टीम इन्डियाका लागि रहाणेले २५ खेलमा चौथो नम्बरमा ब्याटिङ गर्दै ३६.६५ को औसतमा ८४३ रन बनाएका छन् । जसमा ६ अर्धशतक समावेश छ । रहाणेले नम्बर १ मा सर्वाधिक १४८८ र नम्बर २ मा ४४९ रन बनाएका छन् ।
