एजेन्सी । भारतमा अक्टोबर–नोभेम्बरमा हुने एकदिवसीय विश्वकपको खेल तालिका मंगलबार सार्वजनिक भएको छ । यसैबीच पाकिस्तान क्रिकेट बोर्ड (पीसीबी)ले विश्वकपमा सहभागी हुने बारे एक विज्ञप्ति जारी गरेको छ ।
पीसीबीले विश्वकपमा सहभागिताका लागि पाकिस्तान सरकारबाट अहिलेसम्म अनुमति नपाएको जनाएको छ ।
इन्टरनेशनल क्रिकेट काउन्सिल (आईसीसी)ले पीसीबीको भनाइको जवाफ दिएको छ । आईसीसीले पीसीबीसँग विश्वकपमा सहभागी हुन सम्झौता गरेको जनाएको छ । ‘हामी विश्वस्त छौं कि उनको टोली यसबाट पछि हट्नेछैन ।’ आईसीसी भन्छ । विश्वकपमा पाकिस्तानले नकआउट राउण्डअघि ९ खेल खेल्नेछ । प्रतियोगिताको सबैभन्दा चर्चित खेल अर्थात् भारत–पाकिस्तान खेल १५ अक्टोबरमा हुने भएको छ ।
भारतको कुनै पनि भ्रमणका लागि पीसीबीले पाकिस्तान सरकारको स्वीकृति लिनुपर्छ । भारतमा खेल्ने ठाउँहरूको लागि अनुमति लिनुपर्छ । जहाँसम्म विश्वकपको सवाल छ, पीसीबीले अनुमति पाउन बाँकी छ । पीसीबीले सरकारसँग निरन्तर सम्पर्कमा रहेको जनाएको छ । सरकारबाट कुनै निर्देशन प्राप्त हुने बित्तिकै पीसीबीले यसबारे आईसीसीलाई जानकारी गराउने जनाएको छ ।
