काठमाडौं । घोराही सिमेन्टको आईपीओ स्थगित भएको छ । आइपीओमा १० लाख कित्ताका दरले १२ जनाले फर्जी आवेदन दिएको पाइएपछि आइपीओ स्थगित गरिएको हो ।
कम्पनीको आईपीओमा ४३ करोड ३५ लाख रुपैयाँबराबरको १० लाख कित्ताका दरले आवेदन दिने १२ जनाको आवेदन अस्वीकृत भइसकेको छ ।
यसरी फर्जी आवेदन दिनेमा भक्तपुरका प्रेमप्रसाद आचार्य , उज्जवल आचार्य र श्रीजा पोखरेल छन् । साथै गोरखाको सिरानचोकका सावित्रा पराजुली, रुपन्देहीको तिलोत्तमाका लक्ष्मी घिमिरे, मोरङ कानेपोखरीका मुना खत्री र चितवन भण्डाराका मनोज पाठक छन् । सुनसरीको देवानगन्जका मिथिलेशकुमार मेहता, दोलखाको नाम्दुका नवीन खत्री, ललितपुर टिकाथलीका अनिल राना, पर्वतको कार्कीनेटाका रञ्जना ढकाल पौडेल र काठमाडौंको मध्यबानेश्वरका सुमित्रा बमले पनि फर्जी आवेदन दिएका छन् ।
उनीहरु सबैले १० लाखका दरले १ करोड २० लाख कित्ता फर्जी आवेदन भेटिएपछि सोमबार घोराही सिमेन्टको आईपीओ स्थगन भएको थियो । फर्जी आवेदनमा लगातार वृद्धि भएपछि नेपाल धितोपत्र बोर्डले इस्यु म्यानेजरलाई तत्काल आवदेन स्थगन गर्न पत्र पठाएको थियो ।
अख्तियारमा उजुरी
घोराही सिमेन्टको आईपीओमा फर्जी आवेदन दिने लगानीकर्ताको कागजात अख्तियार दुरुपयोग अनुसन्धान आयोगमा पुगेको छ । १० लाख कित्ताका दरले फर्जी आवेदन दिने १२ लगानीकर्ताको विवरण अख्तियार पुगेको हो । १० लाख कित्ताका लागि आवेदन दिँदा बैंक खातामा कम्तीमा ४३ करोड ३५ लाख हुनुपर्नेमा कम पैसा भेटिएपछि उनीहरुको आवेदन रद्द भइसकेको छ ।
सर्वसाधारणलाई अन्योलमा पार्ने गरी जालसाझीयुक्त कारोबार गरेको पाइए धितोपत्र ऐनअनुसार सजाय हुनेछ । ऐनको दफा ९८ अनुसार जालसाझीयुक्त कारोबार गरेको प्रमाणित भएमा दफा १०१ को उपदफा ३ अनुसार १ लाखदेखि ३ लाख रुपैयाँसम्म जरिवाना वा दुई वर्षसम्म कैद वा दुवै सजाय हुनसक्नेछ । त्यस्तो कारोबारबाट कसैलाई हानी नोक्सानी भएमा क्षतिपूर्तिसमेत भराउने व्यवस्था ऐनमा छ ।
कम्पनीको आईपीओमा ४३ करोड ३५ लाख रुपैयाँबराबरको १० लाख कित्ताका दरले आवेदन दिने १२ जनाको ५ अर्ब २० करोड २० लाख रुपैयाँबराबरको आवेदन रिजेक्ट भइसकेको छ । ठूलो संख्यामा फर्जी आवेदन परेपछि कम्पनीको सेयरमा उच्च आकर्षण देखाउन खोजिएको रुपमा बुझिएको छ ।
सामूहिक लगानी कोष, कर्मचारी, स्थानीय र वैदेशिक रोजगारीमा रहेका नेपालीलाई छुट्याएको सेयर पुरै बिक्री नभएपछि त्योसमेत थप गरेर कम्पनीले सर्वसाधारणका लागि आईपीओ खुला गरेको थियो ।
असार ४ सम्म आवेदन दिने म्याद रहेको कम्पनीको सेयरमा मागभन्दा २ गुणा बढी आवेदन परे पनि समय थप गरिएको थियो । कम्पनीले सोमबार सूचना निकालेर आवेदन भेरिफाइ भइरहेकाले म्याद थप भएको जनाएको थियो ।
कम्पनीले धितोपत्र बोर्डबाट उद्योग प्रभावित क्षेत्रका स्थानीयलाई प्रतिकित्ता १ सय रुपैयाँ अंकित मूल्यमा ३ सय प्रिमियम थप गरी प्रतिकित्ता ४ सय रुपैयाँको सेयर निष्कासन गर्ने स्वीकृति पाएको थियो ।
सर्वसाधारणका लागि भने प्रतिकित्ता १ सय रुपैयाँ अंकित मूल्यमा ३३५ रुपैयाँ प्रिमियम थप गरी ४३५ रुपैयाँ प्रतिकित्ताका दरले सेयर निष्कासन गर्ने स्वीकृति पाएको थियो ।
