काठमाडौं । नेपाली कांग्रेसको संस्थापन इतर पक्षले १४औं महाधिवेशन कसरी गर्ने भन्ने विषयमा विकल्प खोज्न थालेको छ ।
पार्टीभित्र संस्थापन इतर मानिएको वरिष्ठ नेता रामचन्द्र पौडेल समूहले कोरोना महामारीका कारण महाधिवेशन नै नहुने अवस्था आएपछि विकल्पबारे छलफल थालेको हो ।
नेता पौडेलले अब पनि तोकिएको समयमा महाधिवेशन गर्न नसकिए पार्टी वैधानिक र संवैधानिक रुपमा नै संकटमा पर्ने पारेका छन् ।
१४औं महाधिवेशनका लागि हालसम्म वितरित क्रियाशिल सदस्य मध्येबाट महाधिवेशन गर्न सकिने एउटा विकल्प र अर्को १३औं महाधिवेशनमा प्रतिनिधि रहेकाहरुबाट नै तत्कालका लागि केन्द्रीय समिति निर्वाचित गर्न सकिने संस्थापन इतर पक्षको निष्कर्ष छ ।
नेताहरु हाल जारी भर्चुअल बैठकमा यही विषयमा केन्द्रीत भएर छलफल गर्दैछन् ।
नेपालको संविधानको धारा २६९ को उपधारा ४ ‘ख’ अनुसार पाँच वर्षभित्र दलले आफ्नो अधिवेशन गर्न नसकेमा ६ महिना म्याद थप्न गर्न सक्ने व्यवस्था छ ।
कांग्रेसले भने संविधानले दिएको उक्त सुविधा प्रयोग गरिसकेको छ । सोही व्यवस्था अनुसार कांग्रेसको वर्तमान कार्यसमितिको म्याद भदौसम्म रहेको छ ।
