काठमाडौं । नेपालमा कोरोना संक्रमण हुनेको संख्या ६ लाख नाघेको छ । स्वास्थ्य तथा जनसंख्या मन्त्रालयका प्रवक्ता कृष्णप्रसाद पौडेलका अनुसार एन्टेजिन र पिसिआर विधिबाट गरिएको परीक्षणमा ६ लाख एक हजार ६९३ जनामा कोरोना भाइरसको संक्रमण पुष्टि भएको हो ।
जसमध्ये ३८.९ प्रतिशत महिला र ६१.१ प्रतिशत पुरुषहरु रहेका छन् । यो संक्रमण २१ बर्षको उमेरदेखि ५० बर्ष समूहमा उच्च रहेको स्वास्थ्य तथा जनसंख्या मन्त्रालयको आँकडा छ । हालसम्म कोरोना संक्रमण भई निको हुनेको संख्या ४ लाख ९१ हजार ९ जना पुगेको छ । ७ हजार ८९५ जनाको कोभिड –१९ को कारण मृत्यु भएको प्रवक्ता पौडेलले बताए ।
पछिल्लो साताको तथ्याङ्कको आधारमा नेपालमा कोरोना भाइरस संक्रमितको संख्या केही कमि आएको उनले बताए ।