काठमाडौँ । पशुपतिनाथको जलहरीमा सुन कि पित्तल भन्ने विवादले शुक्रबार प्रतिनिधिसभा बैठक अवरुद्ध भयो । दुई शब्दलाई प्रमुख पतिपक्षी दल नेकपा (एमाले)ले गम्भीर आरोपका रुपमा अथ्र्याएको छ भने सत्तापक्षले यसलाई अनावश्यक विवाद मानेका छन् । यस विवादलाई लिएर शनिबार विहान प्रधानमन्त्रीसहित शीर्ष नेताबीच हुने छलफलबाट मात्र टुंगो लाग्ने भएको छ । छलफलले कुनै निकास ननिकालेसम्म शनिबार ४ बजेका लागि तोकिएको बैठक अघि बढ्ने अवस्था छैन ।
जेठ १० गते नीति तथा कार्यक्रम छलफलमा नेकपा (माओवादी केन्द्र)का सांसद लेखनाथ दाहालले एमाले अध्यक्ष केपी शर्मा ओली प्रधानमन्त्री हुँदा जलहरीमा सुनको सट्टा पित्तल प्रयोग गरी अनियमितता गरेको आरोप लगाएको दुई दिनपछिको बैठकमा एमालेले विरोध गर्दै रोष्ट्रम नै घेराउ गरेको थियो । यो समाचार आजको गोरखापत्रमा प्रकाशित छ ।
