काठमाडौँ । कोरोना महामारीका कारण प्रभावित विदेशी पर्यटक आगमनले लय लिन थालेसँगै होटलहरुको आम्दानी पनि बढ्न थालेको छ । विदेशी पर्यटक आगमन कोरोना अघिकै लयमा पुग्ने प्रयास गरिरहँदा होटलहरुको आम्दानीको ग्राफ पनि उकालो लागेको हो ।
पछिल्लो समय मासिक करिब एक लाख विदेशी पर्यटक आउने थालेसँगै होटल बुकिङ औसतमा ५० प्रतिशतभन्दा बढी पुगेको छ । तारे होटल मात्रै होइन, पर्यटक स्तरीय होटलमा पनि बुकिङ बढेको व्यवसायीहरुको भनाइ छ ।
कोरोना महामारी सुरु भएयता गत वर्षसम्म करोडौँ घाटामा रहेका होटलहरु यतिबेला भने फाइदामा जान थालेका छन् । नेपाल स्टक एक्सचेञ्ज ९नेप्से०मा सूचिकृत तीन वटा पाँच तारे होटलको चालु आर्थिक वर्षको तेस्रो त्रैमासिक प्रतिवेदनका आधारमा होटलहरु आम्दानीले लय समात्न लागेको स्पष्ट देखिन्छ ।
पाँच तारे होटल सोल्टीको गत आवको तेस्रो त्रैमाससम्म १० करोड ८५ लाख ९७ हजार ३७१ रुपैयाँ खुद नाफा भएकोमा होटलले चालु आवको सोही अवधिमा ३७ करोड ११ लाख ७९ हजार ६७९ रुपैयाँ खुद नाफा गरेको छ । जुन २४१.७९ प्रतिशतले बढी हो ।
साथै, तारागाउँ रिजेन्सी होटल हायातले पनि गत वर्षको समीक्षा अवधिमा ४ करोड १४ लाख २९ हजार १७६ रुपैयाँ खुद नाफा आर्जन गरेकोमा चालु आवको सोही अवधिमा २३ करोड ८८ लाख ४५ हजार ६०७ रुपैयाँ खुद नाफा आर्जन सफल भएको छ । जुन ४७६.५१ प्रतिशतले बढी हो ।
त्यसैगरी ओरियन्टल होटल्स अर्थात् लाजिम्पाटस्थित होटल र्याडिसनको आम्दानी पनि बढेको छ । गत वर्षको समीक्षा अवधिमा १० करोड ५२ लाख ९१ हजार ४८० रुपैयाँ घाटामा रहेको होटलले यस वर्षको सोही अवधिमा भने ६ करोड २४ हजार ४२८ रुपैयाँ खुद नाफा आर्जन गर्न सफल भएको छ ।
होटल एसोसिएसन नेपाल ९हान०का अनुसार होटलले खर्च उठाउनका लागि मात्रै पनि कम्तीमा ३५ देखि ४० प्रतिशत अकुपेन्सी हुनुपर्छ । तर पछिल्लो समय औसतमा ५० प्रतिशतभन्दा बढी अकुपेन्सी रहेको व्यवसायीहरुले बताएका छन् ।
यद्यपि हानले भने कोरोना महामारीका कारण होटल व्यवसाय सबैभन्दा बढी प्रभावित भएको र यस क्षेत्रलाई अझै पनि नीतिगत सुविधा आवश्यक पर्ने बताउँदै आएको छ । नेपाल राष्ट्र बैंकले पनि चालु आवको मौद्रिक नीतिको तेस्रो समीक्षामार्फत होटल, निर्माण क्षेत्र र पशुपंक्षी पालनका लागि राहत दिँदै २०८० असार मसान्तसम्म कर्जाको पुनरतालिकीकरण र पुनसंरचना गर्न सक्ने सुविधा उपलब्ध गराएको छ ।
यसले व्यवसायीहरुलाई ठूलो राहत पुगेको हानको भनाइ छ । हानले राष्ट्रको बैंकको उक्त कदमको खुलेर स्वागत गर्दै आगामी आर्थिक वर्षको वार्षिक बजेटमा पनि सोही अनुसारको सुविधा उपलब्ध गराउन माग गरेको छ ।
