एजेन्सी । इंग्लिस प्रिमियर लिग फुटबल अन्तर्गत क्रिस्टल प्यालेसले रोमाञ्चक जित निकालेको छ ।
शनिबार सम्पन्न खेलमा प्यालेसले वेस्टहाम युनाइटेडलाई ४–३ गोलले पराजित गरेको हो ।
प्यालेसको घरेल मैदानमा सुरुवाती अग्रता भने वेस्टहामले लिएको थियो । खेलको नवौं मिनेटमा टोमास सोसेकले गोल गर्दै वेस्टहामलाई सुरुवाती अग्रता दिलाएका थिए । १५ औं मिनेटमा जोर्डन एइउले गोल गर्दै प्यालेसलाई १–१ को बराबरीमा ल्याए ।
२० औं मिनेटमा विल्फ्रेड जाहाको गोलबाट प्यालेस २–१ ले अघि बढ्यो । ३० औं मिनेटमा जेफरी स्क्लुपले गोल गर्दै प्यालेसलाई ३–१ ले अगाडि बढाए । ३५ औं मिनेटमा मिसेल एन्टोनीओले गोल गर्दै वेस्टहामलाई २–३ को स्थितीमा ल्याए ।
६६ औं मिनेटमा एव्रेची एजेले पेनाल्टीमा गोल गर्दा प्यालेस ४–२ को अवस्थामा आयो । ७२ औं मिनेटमा नायफ अग्वेर्डले गोल गरेपनि वेस्टहामको हार टार्न सकेनन् । वेस्टहाम ३–४ ले पराजित भयो ।
योसँगै प्यालेस ३४ खेलबाट ४० अंकका साथ ११ औं स्थानमा रहेको छ । वेस्टहाम ३३ खेलबाट ३४ अंकका साथ १५ औं स्थानमा छ ।
