काठमाडौँ । प्रधानमन्त्री पुष्पकमल दाहाल प्रचण्डले दलित समुदायका माग पूरा गर्न सक्ने आफू मात्रै भएको बताउनुभएको छ ।
जातीय छुवाछूतविरुद्ध अन्तर्राष्ट्रिय दिवसका अवसरमा मंगलबार काठमाडौँमा दलित संघर्ष समितिले आयोजना गरेको कार्यक्रममा उहाँले दलित समुदायबाट आएका माग आजका मितिमा कसैले पूरा गर्न सक्छन् भने त्यो आफू मात्र भएको बताउनुभयो ।
प्रधानमन्त्री प्रचण्डले दलित समुदायले पछिसम्म सम्झने गरी नयाँ कार्यक्रमको घोषणा गर्ने जानकारी दिनुभयो । दलित समुदायले अहिलेसम्म प्राप्त गरेको अधिकार संघर्षबाट मात्र सम्भव भएको भन्दै उहाँले अधिकार प्राप्तिको लडाइँलाई सांस्कृतिक संघर्षका रुपमा बुझ्नुपर्ने बताउनुभयो ।
