काठमाडौं । नेपाली क्रिकेट टोलीका मुख्य प्रशिक्षक मोन्टी देशाईले नेपाललाई भारतले रणजी ट्रफी खेल्न अनुमति दिनुपर्नेमा जोड दिएका छन् ।
आइसिसी विश्वकप लिग २ मा नेपालकोे सानदार प्रदर्शनपछि विश्व चर्चित अनलाइन क्रिकबजसँग कुराकानी गर्दै मोन्टीले अन्तर्राष्ट्रिय क्रिकेट परिषद् (आइसिसी) र भारतीय क्रिकेट बोर्ड (बिसिसीआई) लाई उक्त प्रतियोगिताको लागि कुरा गरेको बताएका हुन् ।
मोन्टीले भनेका छन् ,‘मैले आइसिसी र जय भाई (बिसिसिआई सचिव तथा एसिसी अध्यक्ष जय शाह) लाई भनेको छु । स्कटल्यान्ड र आयरल्यान्डले पनि इंग्ल्यान्डमा खेल्छन् । हाम्रो टोलीलाई भारत र रणजी ट्रफी खेल्न अनुमति दिनुपर्छ । यदि त्यस्तो भयो भने हामी चार वर्षमा टेष्ट खेल्ने राष्ट्र हुनेछौं ।’, उनले भने, ‘यदि तपाईंले वरपर हेर्नुभयो भने अफगानिस्तानसहित सबै छिमेकी राष्ट्र टेस्ट मान्यता प्राप्त छन् । वास्तवमा नेपाल र अफगानिस्तानले सँगै खेल्न सुरु गरेका थिए’ ।
रणजी ट्रफी भारतको सबैभन्दा ठूलो प्रथम श्रेणीको घरेलु क्रिकेट प्रतियोगिता हो । रणजी ट्रफी खेल्ने खेलाडीको एक दिनको म्याच फि ६० हजार भारु हुन्छ । प्लेइङ ११ मा नरहेका खेलाडीले पनि पर म्याच ३० हजार भारु फि पाउँछन् । त्यस्तै, भारतमा राष्ट्रिय प्रतियोगितामा सैद मुश्ताक अली र विजय हजारे ट्रफी हुने गर्दछ । यी दुई प्रतियोगिताको प्रदर्शनको आधारमा खेलाडिहरुले भारतीय टोली र आइपिएलमा स्थान बनाउँछन् ।
मुख्य प्रशिक्षक मोन्टीले नेपाली टिमलाई भारतमा खेलाईने यी प्रतियोगिताहरुमा समावेश गर्नको लागि अनुरोध गरेका हुन् । नेपाली टोलिलाई भारतले समाबेश गरेमा नेपालले यसबाट धेरै फाईदा लिन सक्नेछन् ।
मोन्टीको मुख्य प्रशिक्षकमा नै आइसिसी विश्वकप लिग २ मा नेपालले १२ मध्ये ११ खेल जित्दै शीर्ष तीनमा रहँदै सोझै विश्वकप छनोटमा स्थान बनाएको छ । यससँगै नेपालले आगमी चार वर्षको लागि ओडिआई मान्यता जोगाएको छ ।
