काठमाडौँ । प्रधानमन्त्री उपस्थित भइरहेको अवस्थामा मन्त्रीले विधेयक प्रस्तुत गरेकोमा एमालेका सांसदले आपत्ति जनाउनु भएको छ ।
आइतबारको संसद बैठकमा प्रधानमन्त्री पुष्पकमल दाहाल प्रचण्ड हुँदाहुँदै सञ्चारमन्त्री रेखा शर्मालाई विधेयक प्रस्तुत गर्न दिइएको भन्दै एमाले सांसदद्वय योगेश भट्टराई र रघुजी पन्तले आपत्ति जनाउनु भएको हो ।
संवैधानिक परिषद् सम्बन्धि विधेयक सञ्चार मन्त्रीले प्रस्तुत गर्न लागेकोमा एमालेका योगेश भट्टराईले शुरुमै प्रश्न उठाउनुभयो । भट्टराईले भन्नुभयो ‘प्रधानमन्त्री नै उपस्थित भएको अवस्थामा अर्को मन्त्रीले प्रस्तुत गर्दा यो सुहाउने विषय भएन । प्रधानमन्त्रीले नै प्रस्तुत गर्नुपर्यो ।’
त्यसलगत्तै अर्का सांसद रघुजी पन्तले पनि विरोध जनाउनुभयो । संसदकै अवहेलना भएको भन्दै पन्तले आपत्ति जनाएपनि सभामुख घिमिरेले भने मन्त्री शर्मालाई नै विधेयक पेश गर्न अनुमति दिनुभयो ।
