एजेन्सी । इंग्लिस फुटबल क्लब म्यान्चेस्टर सिटीले च्याम्पियन्स लिगको क्वाटरफाइनलमा स्थान बनाएको छ ।
मंगलबार राति भएको अन्तिम १६ को दोस्रो लेगमा जर्मनको फुटबल क्लब आरबी लाइप्जिगलाई ७–० ले पराजित गर्दै समग्रमा ८–१ को नतिजासहित सिटीले अन्तिम आठमा स्थान बनाएको हो ।
दोस्रो लेग अन्तर्गत घरेलु मैदानमा सिटीलाई सानदार जित दिलाउन एर्लिङ हालाण्डले ५ तथा इल्काए गुन्डोवान र केभिन डी ब्रुएनाले एक–एक गोल गरे ।
हालाण्डले पहिलो हाफमै ह्याट्रिक पूरा गरेका थिए । उनले खेलको २२ औं मिनेट(पेनाल्टीमार्फत), २४, ४५.२, ५३ औं र ५७ औं मिनेटमा गोल गरेका हुन् । उनी च्याम्पियन्स लिगमा एकै खेलमा पाँच गोल गर्ने पाँचौं खेलाडी बनेका छन् ।
