एजेन्सी । टर्कीका गोलरक्षक अहमेत एयुप तुर्कसलानको भूकम्पमा परी मृत्यु भएको छ ।
सोमबार भएको विनाशकारी भूकम्पमा परी टर्की र सिरियामा ५ हजारभन्दा बढीको निधन भएको छ । त्यसमा गोलरक्षक अहमेत एयुप तुर्कसलान पनि परेको उनको क्लब येनी मालत्यास्पोरले पुष्टि गरेको छ ।
‘हाम्रा गोलरक्षक अहमेट एयुप तुर्कसलानको भूकम्पमा परि निधन भएको छ । हार्दिक श्रद्धान्जली । तपाईलाई हामी बिर्सने छैनौं ।’ क्लबले आफ्नो आधिकारिक ट्वीटर ह्यान्डलमा ट्वीट गरेको छ ।
२८ वर्षीय तुर्कासलानले सन् २०२१ मा क्लबमा आवद्ध भएपछि दोस्रो डिभिजन क्लब येनी मालत्यास्पोरबाट ६ पटक खेलेका थिए ।
टर्कीकै दोस्रो डिभिजनको क्लब केकुर रिजेस्पोरबाट खेल्ने क्रिस्टल प्यालेस र एभर्टनका पुर्व विंगर यानिक बोलासीले पनि उनको निधनमा उनका सबै परिवार र टोलीका साथीहरूप्रति समवेदना व्यक्त गरेका छन् ।
टर्कीकै क्लबबाट व्यवसायिक खेल खेलिरहेका तुर्कसलानले राष्ट्रिय टोलीमा भने स्थान बनाउन सकेका थिएनन् ।
