काठमाडौँ । बंगलादेशमा जारी साफ यू–२० महिला च्याम्पियनशिप फुटबल अन्तर्गत नेपाल फाइनलमा प्रवेश गरेको छ । नेपालले राउण्ड रोबिन लिगको आफ्नो अन्तिम खेलमा भारतलाई ३–१ गोलले पराजित गर्दै फाइनलमा स्थान बनाएको हो ।
ढाकास्थित विर श्रेष्ठ शहिद सिपाही मुस्तोफा कमल स्टेडियममा भएको खेलमा नेपाललाई जित दिलाउन अन्जली चन्द, प्रिती राई र अमिशा कार्कीले एक–एक गोल गरे ।
खेलको ४८ औँ मिनेटमा अन्जलीले गोल गर्दै नेपाललाई बराबरी गरिन् । खेलको ६७ औं मिनेटमा प्रितीले पेनाल्टीमा गोल गर्दै नेपाललाई २–१ को अग्रता बनाइन् ।
यस्तै, ८८ औं मिनेटमा अमिशाले गोल गर्दै नेपालको जित सुनिश्चित गरिन् । भारतकी अपूर्ण नार्जारीले एक गोल फर्काइन् । पहिलो हाफमा एक गोलले पछि परेको नेपाल अग्रता उल्ट्याएर विजयी बनेको हो । जितसँगै नेपाल ३ खेलमा ६ अंक जोडेर शीर्ष स्थानमा उक्लिएको छ ।
प्रतियोगितामा नेपालसहित आयोजक बंगलादेश, भारत र भुटानको सहभागिता रहेको छ । राउण्ड रोबिनको आधारमा हुने प्रतियोगिताको शीर्ष दुई टोलीले उपाधिका लागि प्रतिस्पर्धा गर्ने छन् ।
