काठमाडौँ । नागरिक उन्मुक्ति पार्टीसमेत नयाँ सरकारमा सहभागी नहुने भएको छ । यसअघि प्रधानमन्त्री पुष्पकमल दाहाल प्रचण्डको नेतृत्वको सरकारलाई समर्थन गरेको राष्ट्रिय प्रजातन्त्र पार्टी (राप्रपा) ले पनि सरकारमा नजाने बताएको थियो ।
नागरिक उन्मुक्ति पार्टीले रेशम चौधरीको रिहाइलाई बटमलाइन बनाउँदै सरकारमा सहभागी नभई बाहिरैबाट समर्थन गर्ने जनाएको हो ।
पार्टी अध्यक्ष रञ्जिता चौधरीले प्रचण्ड नेतृत्वको सरकारलाई आफ्नो पार्टीको समर्थन रहेको भए पनि सरकारमा जाने कुरा तत्काल नसोचेको र अहिले नै सरकारमा नजाने स्पष्ट गर्नुभयो ।
प्रधानमन्त्री प्रचण्डले रेशम चौधरीको रिहाइका लागि पहल गर्ने आश्वासन दिएकाले उहाँको नेतृत्वको सरकारलाई समर्थन गरेको अध्यक्ष चौधरीले बताउनुभयो ।
सरकारमा सहभागी हुने वा नहुने विषयमा छलफल गर्न पार्टीका संस्थापक रेशम चौधरीले शीर्ष नेताहरुलाई डिल्लीबजारस्थित कारागारमा बोलाउनुभएको थियो ।
नयाँ बानेश्वरस्थित संघीय संसद् भवनमा नयाँ सत्ता गठबन्धनको बैठक बसिरहँदा नागरिक उन्मुक्ति पार्टीका नेताहरु सहभागी थिएनन् ।
प्रतिनिधिसभामा नागरिक उन्मुक्ति पार्टीका ३ सांसद छन् ।
