काठमाडौँ । प्रधानमन्त्री निवास बालुवाटारमा सत्ता गठबन्धनको बैठकमा नयाँ सरकार र शक्ति बाँडफाँटका विषयमा कुनै सहमति हुननसकेपछि बाहिरिनुभएका नेकपा (माओवादी केन्द्र) का अध्यक्ष पुष्पकमल दाहाल प्रचण्ड नेकपा (एमाले) का अध्यक्ष केपी शर्मा ओलीसँग भेट्न ओली निवास बालकोट पुग्नुभएको छ ।
यसअघि बालुवाटारमा सहमति हुननसकेपछि उहाँ नयाँ सरकारको नेतृत्वका लागि नेकपा (एमाले) को समर्थन खोज्न एमाले अध्यक्ष केपी शर्मा ओलीलाई भेट्न ओली निवास बालकोट जानु भएको हो । बालकोटमा माओवादीका महासचिव देव गुरुङसहितका नेताहरु पनि हुनुहुन्छ ।
यसअघि नेपाली कांग्रेसले सरकारको नेतृत्व माओवादीलाई दिन नसक्ने स्पष्ट सन्देश दिइसकेको छ । प्रधानमन्त्री देउवाको सन्देश लिएर आज बिहान माओवादी केन्द्रका प्रचण्डलाई भेट्नु पुग्नु भएका कांग्रेस नेता विमलेन्द्र निधिले प्रधानमन्त्री र राष्ट्रपति दुवै कांग्रेसले छोड्न नसक्ने सन्देश दिनुभएको थियो ।
निधिसँगको छलफलपछि अध्यक्ष प्रचण्डले कांग्रेसको प्रस्ताव आफूलाई स्वीकार्य नभएको सन्देश देउवालाई पठाउनु भएको काग्रेसका एक नेताले जानकारी दिनुभयो ।
त्यसपछि सत्ता गठबन्धनको बैठक बस्नुअघि प्रधानमन्त्री शेरबहादुर देउवा र अध्यक्ष प्रचण्डबीच ‘वान टु वान’ छलफल भएको थियो तर कुनै निष्कर्ष निस्किएको थिएन ।
सत्ता गठबन्धनमा सहमति हुन नसकेको परिस्थितिमा कांग्रेस र माओवादी दुवैले नेकपा एमालेसँग पनि छलफल जारी राखेको बताइएको छ । कांग्रेस नेता विमलेन्द्र निधिले शनिबार बेलुकी एमाले अध्यक्ष केपी शर्मा ओलीसँग पनि छलफल गर्नुभएको थियो ।
