कैलाली । कञ्चनपुरको बेलौरी नगरपालिकाकी १७ वर्षिया किशोरी बलात्कारको आरोपमा प्रहरीले तीन जनालाई पक्राउ गरेको छ । कक्षा ९ मा अध्ययन गरिरहेकी किशोरीलाई पटकपटक बलात्कार गरेको भन्दै किशोरी र परिवारजनको जाहेरीका आधारमा प्रहरीले तीन जनालाई पक्राउ गरेको हो ।
बलात्कारको आरोपमा पक्राउ पर्नेमा बेलौरी नगरपालिकाका २० वर्षीय दीपक बोट, ३७ वर्षीय साधुराम राना र ३३ वर्षीय हरिशंकर राना रहेका छन् । उनीहरुमाथि थप अनुसन्धान भईरहेको इलाका प्रहरी कार्यालय बेलौरीका प्रहरी निरीक्षक दानसिंह भण्डारीले जानकारी दिए।
पक्राउ परेका तीनै जना किशोरीको आफन्ति रहेको र उनीहरुले फरक फरक मितिमा किशोरीलाई बलात्कार गरेको प्रहरीले जनाएको छ ।
किशोरीको स्वास्थ्य परीक्षणका लागि सेती प्रादेशिक अस्पताल धनगढी लगिएको छ। किशोरीको महिनावारी रोकिएपछि परिवारका सदस्यहरूले घटनाबारे थाहा पाए लगत्तै प्रहरीमा जाहेरी दिएका थिए।
