काठमाडौँ । नेपाली कांग्रेसका नेता डा शेखर कोइरालाले पार्टी सभापति शेरबहादुर देउवा र आफू मिलिसकेको बताउनुभएको छ । मोरङको हरैँचामा आयोजित चुनावी कार्यक्रममा उहाँले भन्नुभयो, “म र देउवाजी एकै ठाउँमा उभिएका छौँ ।” उहाँले अब कार्यकर्तालाई विवाद नगर्न सुझाव दिनुभयो ।
“मैले सबै तुष त्यागिसकेँ, स्थानीय निर्वाचन र पार्टी महाधिवेशनमा के भयो, तपाईंहरु पनि अब त्यो तुष त्यागिदिनुहोस्, मैले त त्यागेँ भने तपाईंहरुले किन नत्याग्ने ?”
पार्टीको १४औँ महाधिवेशनमा सभापति पदका लागि आफू र देउवा पक्षधर तलैबाट लड्दै केन्द्रसम्म प्रतिस्पर्धा गरेको उल्लेख गर्दै नेता कोइरालाले भन्नुभयो, “जब म र शेरबहादुरजी नै मिलिसक्यौँ भने तपाईंहरु वडास्तरमा किन झगडा गर्नुहुन्छ रु, तपाईंहरु किन झगडा गरिरहनुभएको छ, मैले बुझ्न सकेको छैन ।”
आफू पक्षधर र पार्टी सभापति पक्षधरबीच तलैदेखि भएको प्रतिस्पर्धा र लडाइँ अब समाप्त भइसकेको उहाँको भनाइ थियो । “मैले पटक पटक शेरबहादुरजीसँग भेटिरहेको छु, हामी एकै ठाउँमा उभिएका छौँ, मेरो कुरा उहाँले सुनिरहनुभएको र मानिरहनुभएको छ”, उहाँले कार्यकर्ताहरुलाई भन्नुभयो, “तर तपाईंहरु तल किन झगडा गरिरहनुभएको छरु के का लागि लडिरहनुभएको छ ?”
निर्वाचनमा होमिएका बेला कार्यकर्ताहरु एकापसमा झगडा गर्नु राम्रो नहुने उहाँको भनाइ थियो ।
