काठमाडौं । नेकपा एमालेका नेता भीम रावलले पार्टी अध्यक्ष केपी शर्मा ओलीले स्वच्छाचारी निर्णयले आफूलाई टिकट नदिइएको आरोप लगाउनुभएको छ ।
आगामी मंसिर ४ गते हुने प्रतिनिधिसभा निर्वाचनको प्रत्यक्षतर्फ टिकट नपाएपछि पत्रकार सम्मलेन गर्दै उहाँले ओलीको स्वेच्छाचारी निर्णयले अछामका जनताको अपमान गरेको बताउनुभयो ।
“भदौ १९ गते अछाम निर्वाचन क्षेत्र नं १ बाट मेरो उम्मेदवारी सर्वसम्मत भएको थियो। भदौ २२ गते सुदूरपश्चिम प्रदेश कमिटीले पनि एकल सिफारिस गरेको थियो। तर, अध्यक्ष ओलीसहितले पार्टीको विधि र सिद्धान्त अवज्ञा गरेका छन्। मसँग कुनै परामर्श नगरी पार्टीभित्र कुनै योगदान नगरेको व्यक्तिलाई उम्मेदवार बनाएर अछामको जनतालाई अन्याय भएको छ”, उहाँले भन्नुभयो ।
अध्यक्ष ओलीको निर्णय स्वेच्छाचारी, अन्यायपूर्ण र गलत भएको उल्लेख गर्दै उहाँले यस्तो निर्णयले जनता र पार्टी संगठनको घोर अपमान भएको टिप्पणी गर्नुभयो । पार्टीका नेताहरुसँग आफूले निर्वाचनमा भाग लिने तयारी गरिरहेको उल्लेख गर्दै नेता रावलले भन्नुभयो, “मैले निर्वाचनमा लड्दिन भनेर सुनियोजितरुपमै प्रचार भएको छ”
अध्यक्ष ओलीसँग माफी मागेपछि टिकट पाइन्छ भन्नु हास्यास्पद भएको उहाँको भनाइ थियो । आफूलाई हराउन नसकिने बुझेपछि टिकट नै खोसिएको उहाँले आरोप लगाउनुभयो ।
