भारतको मोहालीमा मंगलबार साँझ भएको भारत र अस्ट्रेलियाबीचको पहिलो टी२० क्रिकेट प्रतियोगितामा अस्ट्रेलियाले शानदार जित हासिल गरेको छ ।
भारतले प्रस्तुत गरेको २०९ रनको चुनौतीपूर्ण लक्ष्य अस्ट्रेलियाले १९.२ ओभरमा ६ विकेटको क्षतिमा पुरा गरेको थियो । अस्ट्रेलियाको जितमा म्याथ्यु वेड र क्यामरुन ग्रिनको महत्वपूर्ण योगदान रहेको थियो । वेडले २१ बल खेल्दै ४५ रन बनाएका थिए । ग्रिनले ३० बलको सामना गरी ६१ रन बनाएका थिए ।
यसअघि टस हारेर पहिले ब्याटिङको निम्तो पाएको भारतले पनि हार्दिक पान्ड्याको ७१, के एल राहुलको ५५ र सूर्यकुमार यादवको ४६ रनको मद्दतले २०८ रन बनाएको थियो । पान्ड्याले ३० बलको सामना गरी ७१ रन बनाएका थिए जसमा ५ छक्का र सात चौका सामेल थिए ।
यी दुई बीच दोस्रो टी२० खेल आगामी शुक्रबार तथा अन्तिम टी२० आगामी आइतबार हुनेछ ।
टी२० विश्वकप अघि यी दुई बीचको खेल अभ्यासका रुपमा निकै महत्वपूर्ण मानिएको छ ।
