काठमाडौँ । सर्वोच्च अदालतमा नागरिकता विधेयक प्रमाणीकरण रोक्न माग गर्दै रिट निवेदन दर्ता भएको छ ।
राष्ट्रपति विद्यादेवी भण्डारीलाई नागरिकता विधेयक प्रमाणीकरण गर्नबाट रोक्न आदेश जारी हुनुपर्ने रिट निवेदनमा उल्लेख छ ।
वरिष्ठ अधिवक्त डा सुरेन्द्र भण्डारीले गत बिहीबार निवेदन दर्ता गर्नुभएको थियो । सो निवेदन मंगलबार एकल इजलासमा पेशीमा चढेर स्थगित भएको छ ।
रिट निवेदनमा वरिष्ठ अधिवक्त भण्डारीले राष्ट्रपति कार्यालय शीतल निवाससहित प्रतिनिधिसभा, राष्ट्रियसभा, प्रधानमन्त्री तथा मन्त्रीपरिषदको कार्यालय र गृहमन्त्रीलाई विपक्षी बनाउनुभएको छ ।
उहाँले नागरिकता विधेयकले मुलुकको हित नगर्ने भएकाले नागरिकता विधेयक प्रमाणीकरण नगर्न आदेशको माग राखी रिट निवेदन दिएको बताउनुभयो ।
मंगलबार सर्वोच्च अदालतका न्यायाधीश डा मनोज शर्माको एकल इजलासमा परेको थियो । सो निवेदन ‘हेर्न’ नमिल्ने कारण मंगलबार सुनुवाइ हुन नसकेको हो । मंगलबार स्थगित भएपछि सो निवेदन फेरि बुधबारका लागि पेशी तोकिएको छ ।
