युएईमा जारी एसिया कप टी२० क्रिकेट प्रतियोगिता अन्तर्गत शनिबार साँझ शारजाहमा भएको खेलमा श्रीलंकाले अफगानिस्तानलाई चार विकेटले पराजित गरेको छ ।
निकै प्रतिस्पर्धात्मक यस खेलमा टस हारेर पहिले ब्याटिङको निम्तो पाएको अफगानिस्तानले २० ओभरमा ६ विकेट गुमाएर १७५ रन बनाएको थियो । शुरुआत निकै राम्रो भए पनि अफगानिस्तानले पछिल्ला ओभरमा रन बनाउन निकै संघर्ष गर्नु परेको थियो ।
अफगानिस्तानका लागि रहमानुल्लाह गुर्बाजले ४५ बल खेलेर ८४ रनको आकर्षक पारि खेलेका थिए । साथै इब्राहिम जड्रानले ४०, नजिबुल्लाह जड्रानले १७ रन बनाए । एक समय अफगानिस्तानले २०० रन भन्दा बढी बढाउने सम्भावना देखिएको थियो, तर श्रीलंकाको कसिलो बलिङले अफगानिस्तानलाई रोकेको थियो ।
एकसय १७६ रनको लक्ष्य लिएर दोस्रो इनिङ शुरु गरेको श्रीलंकाले निर्धारित लक्ष्य पाँच बल बाँकी छँदै पूरा गरेको थियो ।
श्रीलंकाका लागि पाथुम निसान्काले ३५, कुसल मेन्डिसले ३६, डानुस्का गुनथिलकाले ३३, भानुका राजपाक्षले ३१ रन बनाएका थिए ।
सुपर ४ को यस खेलबाट श्रीलंकाले २ अंक बटुलेको छ ।
आज आइतबार भारत र पाकिस्तानबीच महाभिडन्त हुनेछ । एजेन्सी
