एजेन्सी । इंग्लिस प्रिमियर लिग फुटबल अन्तर्गत म्यान्चेस्टर सिटीले पुनरागमन जित निकालेको छ । पहिलो हाफमा दुई गोलले पछि परेको सिटीले दोस्रो हाफमा चार गोल गर्दै सानदार कमब्याक गरेको हो ।
सिटीको घरेलु मैदान इतिहादमा शनिबार राति भएको खेलमा सिटीलाई ४–२ गोलको जित दिलाउन एर्लिङ हालाण्डले ह्याट्रिक गरे भने एक गोल बर्नार्डो सिल्भाले गरे ।
क्रिस्टल प्यालेसका जोआचिम एन्डरसनको गोल सान्त्वना बन्यो । प्यालेसले एक गोल उपहार पाएको थियो । सिटीका जोन स्टोनले आत्मघाती गोल गरे ।
चौथो मिनेटमा जोन स्टोन्सको आत्मघाती गोलबाट घरेलु टोली सिटी खेलमा पछि परेको थियो । २१औं मिनेटमा जोआचिम एन्डरसनले गोल गरेपछि सिटी पहिलो हाफमा २–० ले पछि परेको थियो ।
तर, दोस्रो हाफमा सिटीले सानदार कमब्याक गर्यो । ५३औं मिनेटमा बर्नाडो सिल्भाले रोड्रीको पासमा गोल गर्दै सिटीलाई खेलमा फर्काए । ६२औं मिनेटमा फिल फोडेनको पासमा हालाण्डले गोल गर्दै सिटीलाई २–२ गोलको बराबरीमा ल्याए ।
७०औं मिनेटमा जोन स्टोन्सको पासमा हालाण्डले व्यक्तिगत दोस्रो तथा टोलीका लागि तेस्रो गोल गर्दै सिटीलाई खेलमा ३–२ को अग्रता दिलाए । ८१औं मिनेटमा इल्काए गुन्डोवानको पासमा हालाण्डले ह्याट्रिक पूरा गरेपछि सिटी ४–२ गोलले विजयी बन्यो ।
यसै समरमा जर्मन क्लब बोरुसिया डर्टमण्डबाट सिटी आएका हालाण्डको यो प्रिमियर लिगमा पहिलो ह्याट्रिक समेत हो ।
जितसँगै सिटी चार खेलमा १० अंक जोड्दै अंकतालिकाको दोस्रो स्थानमा रहेको छ । समान खेल खेलेको प्यालेस ४ अंकसहित १३ औं स्थानमा छ ।
बर्नमाउथको पोस्टमा लिभरपुलले हान्यो ९ गोल
शनिबार राति सम्पन्न अर्को खेलमा लिभरपुलले बर्नमाउथलाई ९–० को फराकिलो गोलले पराजित गरेको छ ।
घरेलु मैदान एनफिल्डमा लिभरपुललाई जित दिलाउन लुइस डियाज र रोबर्टो फिर्मिनोले दुई–दुई गोल गरे भने हार्वी एलिअट, अलेक्जान्डर आर्नल्ड, भान डाएक, फाविओ कार्भाल्होले एक–एक गोल गरे । बर्नमाउथका क्रिस मेफामले आत्मघाती गोल गर्दा लिभरपुलले एक गोल उपहारस्वरुप पायो ।
जितसँगै लिभरपुल चार खेलबाट ५ अंकसहित तालिकाको आठौं स्थानमा रहेको छ । समान खेल खेलेको बर्नमाउथ ३ अंकसहित १६ औं स्थानमा छ ।
आर्सनलको लगातार चौंथो जित
प्रिमियर लिग फुटबल अन्तर्गत आर्सनलले अपराजित यात्रा कायमै राखेको छ । शनिबार राति सम्पन्न खेलमा फलहमविरुद्ध आर्सनलले २–१ गोलको जित निकालेको हो ।
घरेलु मैदान इमिरेट्समा खेलको ५६ औं मिनेटमा फुलहमका एलेक्सान्डर मित्रोभिचले गोल गरेपछि आर्सनल सुरुवाती पछि परेको थियो । आर्सनलका डिफेन्डर गाब्रियल मेगाल्हेसले डि–बक्सभित्र गल्ती गरेपछि मित्रोभिचले गोल गरेका हुन् ।
६४ औं मिनेटमा मार्टिन ओडेगार्डले गोल गर्दै आर्सनललाई १–१ को बराबरीमा ल्याए । तर, ८५ औं मिनेटमा गाब्रियलले गोल गर्दै आर्सनललाई महत्वपूर्ण तीन अंक दिलाए ।
जारी सिजनमा अपराजित रहेको आर्सनले ४ खेलबाट १२ अंक जोड्दै तालिकाको शीर्षस्थानमा कायम छ । समान खेल खेलेको फुलहम ५ अंकसहित ११ औं स्थानमा छ ।
चेल्सीले लेस्टर सिटीलाई हरायो
यस्तै अर्को खेलमा चेल्सीले संघर्षपूर्ण जित निकालेको छ । शनिबार राति नै भएको खेलमा १० खेलाडीमा सिमित चेल्सीले लेस्टर सिटीलाई २–१ गोल अन्तरले हराएको हो ।
चेल्सीलाई जित दिलाउन रहिम स्ट्रर्लिङले दुई गोल गरे । लेस्टरका हार्भे बान्र्सले एक गोल फर्काए ।
खेलको २८ औं मिनेटमा कोनोर गल्लाघेरले दोहोरो पहेलो कार्डसहित रातो कार्ड पाउँदा चेल्सी १० खेलाडीमा समेटिएको थियो ।
तर, खेलको ४७ औं मिनेटमा स्ट्रर्लिङले गोल गर्दै चेल्सीलाई सुरुवाती अग्रता दिलाए । खेलको ६३ औं मिनेटमा स्ट्रर्लिङले व्यक्तिगत दोस्रो गोल गर्दै चेल्सीको अग्रता २–० को बनाए ।
त्यसपछि ६६ औं मिनेटमा बान्र्सले गोल गरेपनि लेस्टरको हार टार्न सकेनन् ।
जितसँगै ४ खेलमा ७ अंक जोड्दै चेल्सी छैटौं स्थानमा रहेको छ । समान खेल खेलेको लेस्टर १ अंक जोडेर १९ औं स्थानमा रहेको छ ।
युनाइटेडले साउथह्याम्प्टनलाई हरायो
म्यानचेस्टर युनाईटेडले प्रिमियर लिगमा लगातार दोस्रो जित निकालेको छ ।
शनिबार भएको खेल युनाईटेडले साउथह्याम्पटनलाई १–० गोलले पराजित गरेको हो ।
युनाईटेडलाई जित दिलाउन ब्रुनो फर्नान्डेजले निर्णायक गोल गरे । खेलको ५५ औं मिनेटमा डालोटको पासमा उनले गोल गरेका हुन् ।
जितसँगै चार खेलबाट ६ अंक जोडेको युनाइटेड तालिकाको सातौं स्थानमा रहेको छ । साउथह्याम्प्टन ४ अंकका साथ १४ औं स्थानमा छ ।
