एजेन्सी । इंग्लिस प्रिमियर लिग फुटबल अन्तर्गत आर्सनलले लगातार तेस्रो जित निकालेको छ । शनिबार राति भएको खेलमा आर्सनलले बर्नमाउथलाई उसकै मैदानमा ३–० गोलले पराजित गरेको हो ।
आर्सनललाई जित दिलाउन मार्टिन ओडेगार्डले दुई गोल गर्दा विलियम सालिबाको नाममा एक गोल रह्यो ।
आर्सनलले खेलको पाँचौं मिनेटमा ओडेगार्डको गोलबाट सुरुवाती अग्रता बनाएको थियो । मार्टिनेलीले प्रहार गरेको बल बर्नमाउथका किपर ट्राभर्सले बचाउ गरेर रिबाउन्ड आएपछि ओडेगार्डले प्रहार गर्दै गोल गरे ।
यस्तै, खेलको ११ औं मिनेटमा बेन ह्वाइटले क्रस गरेको बल जिससले प्रहार गर्नै लाग्दा चलाखीपूर्ण रुपमा ओडेगार्डले नै प्रहार गरी गोलमा परिणत गरे ।
५४ औं मिनेटमा सालिबाले सानदार गोल गरे । उनलाई ग्रानिट जाकाले पास उपलब्ध गराएका थिए । जितसँगै आर्सनल तीन खेलबाट ९ अंक जोड्दै तालिकाको शीर्षस्थानमा छ । उता, बर्नमाउथ समान खेलबाट ३ अंकसहित १४ औं स्थानमा छ ।
