काठमाडौँ । संघीय संसद् सचिवालयले उपसभामुख पदको निर्वाचन कार्यक्रमसम्बन्धी सूचना प्रकाशित गरेको छ ।
सभामुख अग्निप्रसाद सापकोटाले बुधबार बसेको प्रतिनिधिसभाको बैठकमा उपसभामुख निर्वाचनका लागि यही असार ३१ गतेको दिन तोक्नुभएको थियो ।
कार्यक्रम अनुसार यही असार ३० गते बिहीबार बिहान ११ बजेदेखि दिनको १ बजेसम्म प्रतिनिधिसभाको बैठकमा प्रतिनिधिसभाका कुनै सदस्यलाई उपसभामुख पदमा निर्वाचित गरियोस् भन्ने प्रस्तावको सूचना दर्ता गरिने छ ।
सोही दिन दिनको १ः३० बजे निर्धारित समयभित्र दर्ता भएका उम्मेदवारीको सूचनाको दर्ता क्रमानुसार सूची प्रकाशन गरिने छ ।
असार ३१ गते दिनको ३ बजे प्रतिनिधिसभाको बैठकमा उपसभामुख पदमा निर्वाचित गरियोस् भनी प्रस्तावकले प्रस्ताव गर्ने र समर्थकले समर्थन गर्ने, उम्मेदवारीको सूचनामाथि सामूहिक रुपमा छलफल हुने र दर्ता क्रमानुसार निर्णयार्थ प्रस्तुत गर्ने कार्यक्रम छ ।
