काठमाडौँ । नेकपा (एकीकृत समाजवादी) का अध्यक्ष माधवकुमार नेपालले पार्टी नेता तथा कार्यकर्ताहरुलाई अब सम्पूर्ण ध्यान आगामी प्रतिनिधिसभा र प्रदेशसभाको निर्वाचनमा लगाउन निर्देशन दिनुभएको छ ।
उहाँले अरुको भर नपरी सम्पूर्ण शक्तिका साथ निर्वाचनको तयारीमा लाग्न र १६५ निर्वाचन क्षेत्रमै उम्मेदवारी तयारी गर्न निर्देशन दिनुभयो । उहाँले सातै वटा प्रदेशसभाका निर्वाचन क्षेत्रमा समेत उम्मेदवार तयार गर्न निर्देशन दिनुभयो ।
पार्टीको पहिलो केन्द्रीय परिषद् बैठकको सोमबार उद्घाटन गर्दै उहाँले पार्टीले निर्वाचनमा अधिकतम सफलता हासिल हुनेगरी वातावरण बनाउनुपर्ने र त्यसका लागि प्रत्येक कार्यकर्ता जनताको घरघरमा पुग्नुपर्ने बताउनुभयो ।
साथै उहाँले पार्टीलाई वडा तहसम्म विस्तार गर्न निर्देशन दिनुभयो । स्थानीय तहको निर्वाचनमार्फत पार्टी संगठन ६० प्रतिशत वडामा पुगेको उहाँको दाबी थियो ।
