काठमाडौँ । नेपाली कांग्रेसका सभापति शेरबहादुर देउवाले विभाग गठनको तयारी सुरु गर्नुभएको छ । उहाँले यही असार १० गतेभित्रै विभाग गठनको तयारी सुरु गर्नुभएको हो । नवनिर्वाचित कार्यसमितिले सपथ लिएको असार १० गते छ महिना पुग्दैछ ।
सो दिनअघि नै देउवाले विभाग गठन गर्नुहुने बताइएको छ । किनकी नेपाली कांग्रेसको विधानअनुसार महाधिवेशन सकिएको छ महिनाभित्र विभाग र समितिहरु गठन गरिसक्नुपर्नेछ । पार्टीको १४औँ महाधिवेशनबाट निर्वाचित कार्यसमितिले गत पुस १० गते सपथ लिएको थियो ।
यद्यपि पार्टी सभापति देउवाले एकैपटक सबै विभाग नगर्नु हुने जनाइएको छ । सुरुमा सात/आठवटा विभाग गठन हुनेछ । कांग्रेसमा विधानअनुसार २८ वटा विभाग गरहेका छन् । प्रत्येक विभागमा बढीमा ५१ सदस्य रहने व्यवस्था छ । पार्टी सभापतिले प्रमुख, उपप्रमुख, एक सचिव र सदस्यहरुको नियुक्ति गर्ने विधानमा व्यवस्था छ ।
सोमबार पार्टीका महामन्त्रीद्वय गगन थापा र विश्वप्रकाश शर्माले पार्टी सभापति देउवालाई भेटी विभाग गठन गर्न ध्यानाकर्षण गराउनुभएको थियो । उहाँहरुले विभाग गठन, केन्द्रीय समितिको बैठक आह्वान, भ्रातृ संस्था गठनलगायतका विषयमा देउवासँग छलफल गर्नुभएको थियो ।
