काठमाडौं । प्रमुख विपक्षी दल नेकपा एमालेले प्रतिनिधिसभाको सोमबारको बैठक रोक्न माग गरेको छ ।
एमाले सांसद विशाल भट्टराई लगायतका १५ सांसदले बजेटमाथिको छलफल स्थगन गरेर मलको विषयमा छलफल गर्न सार्वजनिक महत्वको प्रस्ताव दर्ता गरेका थिए ।
सोही प्रस्तावमाथि सांसदहरुले धारणा राखिसकेपछि सभामुख अग्नि सापकोटाले बैठक आधा घण्टाका लागि स्थगित भएको घोषणा गरेका हुन् । तर, एमालेको आजको बैठक रोक्नुपर्ने मागले एकघण्टा बितिसक्दा पनि बैठक सुचारु हुन सकेको छैन ।
स्रोतका अनुसार एमालेको प्रतिनिधिसभा बैठक स्थगनको प्रस्तावमाथि अहिले नयाँ वानेश्वर स्थित संसद भवनमै छलफल जारी रहेको छ ।
सभामुख अग्नि प्रसाद सपाकोटाको कार्यकक्षमा जारी छलफलमा कांग्रेस, एमाले, माओवादी केन्द्र, एकीकृत समाजवादी पार्टी संसदीय दलका प्रमुख सचेतक र कानुन मन्त्री र एमाले संसदीय दलका उपनेता सुवास नेम्वाङ लगायत सहभागी छन् ।
एमालेका प्रमुख सचेतक एवं सांसद विशाल भट्टराईले न्यूजपोलारसँग कुरा गर्दै यस मलको विषयलाई जसरी पनि आजै टुंगो लगाइनुपर्ने बताउनुभयो ।
